«Ատրպէյճանի եւ Հայաստանի միջեւ յարաբերութիւններու կարգաւորման հարցով միջնորդական առաքելութեան հետ մէկտեղ մենք կը տեսնենք այլ խաղցողներու կողմէ այդ գործընթացը խոչընդոտելու փորձեր», լրագրողներու հետ հանդիպման ընթացքին յայտարարած է Ռուսիոյ արտաքին գործերու նախարար Սերկէյ Լաւրով:
Ռուսիոյ դիւանագիտութեան ղեկավարը միեւնոյն ժամանակ պնդած է, որ ղարաբաղեան հակամարտութեան կարգաւորման միջնորդական խումբը «թաղած են ֆրանսացիներն ու ամերիկացիները»:
«Մենք անոր հետ կապուած որեւէ խնդիր չենք ունեցած: Յատուկ ռազմական գործողութեան մեկնարկէն յետոյ Արեւմուտքը Փարիզի ու Ուաշինկթընի բերնով պաշտօնապէս յայտարարեց, որ պիտի չհամագործակցի Ռուսիոյ հետ որեւէ ձեւաչափով: Այսպիսով, անոնք յայտարարեցին ԵԱՀԿ Մինսքի Խումբի գործունէութիւնը դադրեցնելու մասին», պնդած է Լաւրով` յաւելելով, որ արեւմտեան միջնորդները փոխարէնը կը փորձեն սեփականաշնորհել այն պայմանաւորուածութիւնները, որոնք ձեռք բերուած են ռուսական մասնակցութեամբ:
«Օրինակ, Պրիւքսէլի մէջ տեղի կ’ունենայ սահմանազատման յանձնաժողովի նիստ: Ատրպէյճանցիներն ու հայերը քաղաքավար մարդիկ են, անոնք կ’երթան այնտեղ: Բայց ինծի համար դժուար է պատկերացնել, թէ առանց նախկին խորհրդային հանրապետութիւններու քարտէզի, որ կը գտնուի ռուսական շտաբին մէջ, ինչպէս կարելի է քննարկել սահմանազատման եւ խաղաղութեան պայմանագրի հարցը», ըսած է Ռուսիոյ արտաքին գործերու նախարարը:
Անցած ամիսներուն «Ազատութիւն» ռատիօկայանի հետ զրոյցին ԱՄՆ պետական քարտուղարի Եւրոպայի եւ Եւրասիոյ հարցերով տեղակալ Քերըն Տոնֆրիտ յայտնած է, որ չնայած Ուքրանիոյ դէմ պատերազմին պատճառով Միացեալ Նահանգները խզած է յարաբերութիւնները Ռուսիոյ հետ, սակայն Ղարաբաղի հարցով պատրաստ է շարունակելու համագործակցութիւնը ԵԱՀԿ Մինսքի Խումբին մէջ` յանուն խնդիրի խաղաղ ու տեւական կարգաւորման: