Յոյս ունիմ, որ Հայաստանի եւ Ատրպէյճանի միջեւ խաղաղութեան պայմանագիրը կը ստորագրուի, Հաւաքական Անվտանգութեան Պայմանագրի Կազմակերպութեան (ՀԱՊԿ) գագաթաժողովին յայտարարեց Ռուսիոյ նախագահ Վլատիմիր Փութինը:
Ան նշեց, որ հանդիպման պիտի քննարկեն երկու հարեւան երկիրներու յարաբերութիւններու համալիր կարգաւորման հարցը:
«Մեր ուշադրութիւնը կեդրոնացած պիտի ըլլայ հայ-ատրպէյճանական համալիր կարգաւորման ջանքերու ամրապնդմանն առնչուող հարցերուն: Այդ բնականաբար սուր հարց է, որ մեր ուշադրութեան կարիքն ունի», նշեց Ռուսիոյ ղեկավարը` յաւելելով, որ Սոչիի մէջ կայացած եռակողմ բանակցութիւնները լաւ հիմք են հետագայ հիմնարար հարցերու լուծման համար:
«Կարեւոր էր, որ համատեղ յայտարարութեան մէջ բարձր մակարդակով վերահաստատուեցաւ հաւատարմութիւնը եռակողմ յայտարարութիւններուն, ինչպէս նաեւ մեր համատեղ ձեւաչափի առանցքային դերին` ուղղուած Հարաւային Կովկասի մէջ խաղաղութեան եւ կայունութեան հաստատման: Միայն այդ պայմանաւորուածութիւնները հետեւողական կատարելու պարագային՝ սահմաններու սահմանազատում, ճանապարհային ապաշրջափակման, մարդասիրական հարցերու լուծման պարագային կարելի է հասնիլ Հայաստանի ու Ատրպէյճանի միջեւ յարաբերութիւններու կայուն կարգաւորման: Յոյս ունինք, որ այդ ի վերջոյ թոյլ պիտի տայ հասնելու խաղաղութեան պայմանագրի կնքման Երեւանի եւ Պաքուի միջեւ»:
Ինչպէս աւելի վաղ յայտնած է Քրեմլինի խօսնակ Տմիթրի Փեսքով, նախագահ Փութին իր թուարկած հարցերը Երեւանի մէջ Հայաստանի վարչապետին հետ երկկողմ հանդիպման ժամանակ պիտի քննարկեն:
Վլատիմիր Փութին շեշտեց, որ ռազմական կառոյցին մէջ դրական զարգացումներէն բացի, արձանագրուած են թերացումներ, որոնց մասին խոստացաւ աւելի մանրամասն խօսիլ ՀԱՊԿ անդամ երկիրներու ղեկավարներու հետ փակ հանդիպման ընթացքին: