Հանրապետութեան նախագահ Վահագն Խաչատուրեան հանդիպում ունեցած է Կեդրոնական դրամատան նախագահ Մարթին Գալստեանի հետ:
Հանդիպման ընթացքին քննարկուած են Հայաստանի ֆինանսական շուկային վերաբերող շարք մը հարցեր: Կեդրոնական դրամատան նախագահ Մարթին Գալստեանը նախագահին մանրամասնութիւններ ներկայացուցած է հայկական դրամի եւ արտարժոյթներու փոխարժէքի տատանումներու վտանգներուն եւ անոնց վերահսկելիութեան մասին:
Կեդրոնական դրամատան նախագահը անդրադարձած է նաեւ արժութային շուկային մէջ հակամրցակցային դրսեւորումներուն եւ Կեդրոնական դրամատան կողմէ նման երեւոյթները բացառող միջոցառումներուն եւ պատժամիջոցներուն:
Նախագահ Խաչատուրեան շեշտած է առկայ իրողութիւններու պայմաններուն մէջ ճկուն դրամավարկային քաղաքականութեան իրականացման կարեւորութիւնը, ինչպէս նաեւ բարձր գնահատած է հայաստանեան ֆինանսական շուկային մէջ Կեդրոնական դրամատան կայունացնող եւ հաւասարակշռող դերակատարութիւնը:
