Եթէ Ուաշինկթըն եւ Փարիզ իսկապէս կարեւորէին ԵԱՀԿ Մինսքի խումբի համանախագահութեան իւրայատուկ միջնորդական ձեւաչափը, ապա իրենց թոյլ չէին տար անտեսելու բոլոր անդամ երկիրներու հաւանութեան արժանացած մանտաթը: Այդ մասին ճեպազրոյցի ժամանակ յայտնեց Ռուսիոյ Արտաքին Գործերու Նախարարութեան պաշտօնական ներկայացուցիչ Մարիա Զախարովա:
«Անոնք առանց որեւէ խորհրդակցութեան Փետրուար 24-էն ցուցադրաբար դադրեցուցած են շփումները Մինսքի խումբի ռուս համանախագահին հետ: Անով եռեակի աշխատանքին մեծ հաշուով անդառնալի վնաս հասցուած է», ընդգծած է Զախարովան` մեկնաբանելով ԱՄՆ պետական քարտուղարի եւրոպական եւ եւրասիական հարցերով տեղակալ Քերըն Տոնֆրիտի յայտարարութիւնը, թէ ԱՄՆ հաւատարիմ է Մինսքի խումբի համանախագահութեան ձեւաչափին:
Զախարովայի խօսքով` ձեւաչափէն հրաժարելու պատճառներուն վերաբերեալ որեւէ յստակ պարզաբանում չէ եղած: Ռուսիոյ Արտաքին Գործերու Նախարարութեան խօսնակը այդ քայլը «անպատասխանատու» որակած է:
Ան յաւելած է, որ ռուսական կողմը շահագրգռուած է Հայաստանի եւ Ատրպէյճանի միջեւ յարաբերութիւններու կարգաւորման հարցով: Զախարովան վստահեցուցած է, որ Մոսկուան պիտի ընէ հնարաւորը, որպէսզի կեանքի կոչուին երեք երկիրներու ղեկավարներու պայմանաւորուածութիւնները: