ՀՀ պաշտպանութեան նախկին նախարար, Ազգային Ժողովի «Հայաստան» խմբակցութեան ղեկավար Սէյրան Օհանեանը յայտարարած է, որ չի տիրապետեր եւ չէ տիրապետած Վահագնի թաղամասին մէջ գտնուող առանձնատան, ինչպէս նաեւ հասարակական նշանակութեան այլ կառաոյցներու:
Սէյրան Օհանեանը նման յայտարարութիւն տարածած է` անդրադառնալով ՀՀ Դատախազութեան տարածած հաղորդագրութեան, որուն մէջ կը նշուէր, որ ՀՀ Գլխաւոր Դատախազութեան ապօրինի ծագում ունեցող գոյքի բռնագանձման գործերով վարչութիւնը պահանջ ներկայացուցած է դատարանին Սէյրան Օհանեանէն եւ անոր հետ փոխկապակցուած թիւով 3 անձերէ յօգուտ Հայաստանի Հանրապետութեան գոյք բռնագանձել:
«Այսպիսով, ՀՀ-ում կամ նրա սահմաններից դուրս որեւէ դատարան չի կարող բռնագանձել սոյն շինութիւնները` որպէս ինձ` Սէյրան Օհանեանիս պատկանող գոյք, այն էլ` ապօրինի», ըսուած է Օհանեանի տարածած յայտարարութեան մէջ:
Օհանեանը նաեւ յաւելած է, որ իր անուան շուրջ պտըտող ստայօդ լուրերը կապուած են Արցախի հարցով իր հակաիշխանական կոշտ դիրքորոշման եւ «Դիմադրութեան» շարժման պայքարի աճող սրութեան հետ:
ՀՀ Գլխաւոր Դատախազութեան ապօրինի ծագում ունեցող գոյքի բռնագանձման գործերով վարչութիւնը պահանջ ներկայացուցած է դատարանին Սէյրան Օհանեանէն եւ անոր հետ փոխկապակցուած թիւով 3 անձերէ յօգուտ Հայաստանի Հանրապետութեան բռնագանձել մասնաւորապէս`
Երեւան քաղաքին մէջ գտնուող 2 հասարակական նշանակութեան տարածքները, Վահագնի թաղամասին մէջ գտնուող առանձնատունը, ինչպէս նաեւ 1 փոխադրութեան միջոց, իսկ անհնարինութեան պարագային` անոնց միջին շուկայական արժէքները, որ ընդհանուր կը կազմէ 1.092.538.513 դրամ:
477.473.907 դրամ` որպէս ապօրինի դրամական միջոցներու մնացորդ, ինչպէս նաեւ 600.762.179 դրամ, որ չի հիմնաւորուիր անձի օրինական եկամուտներով, ունի ապօրինի ծագում եւ հնարաւոր չէ բռնագանձել` հիմք ընդունելով ապօրինի ծագում ունեցող գոյքի բռնագանձման մասին օրէնքի 20-րդ յօդուածի 4-րդ մասը:
