Վարչապետ Փաշինեանի հրաժարականը պահանջող ընդդիմադիրները անհնազանդութեան գործողութիւններ իրականացուզին ինքնաշարժի երթով Երեւանի մէջ շրջելով: Քանի մը ուղղութիւններով շարժող երթի ընթացքին լուրջ խցանումներ չէին յառաջացած, երբ ընդդիմադիրները ինքնաշարժներով փակեցին Աբովեանի փողոցէն դէպի Հանրապետութեան հրապարակ գացող ճանապարհահատուածը:
Տեւական ժամանակ կեդրոնական փողոցին մէջ երթեւեկութիւնը դադրած էր, ոստիկանները ինքնաշարժները քարշակներու միջոցով հեռացուցին ճանապարհէն:
Ընդդիմադիր առաջնորդները քանի մը հարիւր համախոհներով կանգ առած էին Երեւանի քաղաքապետարանին դիմաց:
Ցուցարարներուն եւ ոստիկաններուն միջեւ բախում եղաւ, երբ ցուցարարները կը փորձէին ներխուժել շէնքը: Իշխան Սաղաթէլեանը յայտարարեց, որ պէտք չէ թոյլ տան, որ քաղաքապետարանի աշխատակիցները դուրս գան շէնքէն: Ընդդիմադիրները շիշեր եւ այլ առարկաներ կը նետէին ոստիկաններուն ուղղութեամբ: Ի վերջոյ, ոստիկանութիւնը կրցաւ հանդարտեցնել իրավիճակը:
Արդէն երկու շաբաթ փողոցային պայքարով իշխանութեան հրաժարականը պահանջող ընդդիմութիւնը կը շարունակէ դժգոհիլ ոստիկաններու աշխատանքէն: Կը յայտարարեն, որ իրենց գաղափարակիցները, աջակիցները բերման կ’ենթարկուին, կը կալանաւորուին քաղաքական դրդապատճառներով:
