Հայաստանի վարչապետ Նիկոլ Փաշինեան հեռախօսազրոյց ունեցած է Ռուսաստանի նախագահ՝ Վլատիմիր Փութինի հետ: «Արմէնփրէս»-ի հաղորդմամբ՝ այս մասին յայտնած է Քրեմլինի պաշտօնական կայքը:
Նշուած է, որ, հաշուի առնելով ՀԱՊԿ-ի Հայաստանի նախագահութիւնը, մտքեր փոխանակուած են Ղազախստանի մէջ ՀԱՊԿ-ի խաղաղապահ առաքելութեան ընթացքի վերաբերեալ: Ընդգծուած է խաղաղապահ զօրամասերու գործողութիւններու արդիւնաւէտ համակարգումը, ինչ որ նպաստած է Ղազախստանի իրավիճակի կանոնաւորման:
Քննարկուած են նաեւ Լեռնային Ղարաբաղի շուրջ առկայ իրավիճակը եւ Հայաստանի, Ռուսաստանի եւ Ատրպէյճանի ղեկավարներու 2020-ի Նոյեմբեր 9-ի, 2021-ի Յունուար 11-ի եւ 2021-ի Նոյեմբեր 26-ի ընդունած յայտարարութիւններով հաստատուած պայմանաւորուածութիւններու կատարման շուրջ որոշ հարցեր:
Երկու երկիրներու ղեկավարները պայմանաւորուած են շարունակել շփումները տարբեր մակարդակներով: