Այս օրերուն Միացեալ Նահանգներու տարբեր Հայաշատ քաղաքները կ’այցելեն «Զինծառայողներու Ապահովագրութեան Հիմնադրամի» ներկայացուցիչները, ծանօթացնելու համար իրենց կատարած աշխատանքներու մասին` յատկապէս 44-օրեայ պատերազմի լոյսի տակ:
Լոս Անճելըս ժամանման առթիւ «Հիմնադրամի» պատասխանատուներ Տաթեւիկ Եաղճեան, Նարինէ Գալստեան եւ Սոնա Պաղտասարեան Լոս Անճելըսի ՀՀ հիւպատոսարանէն ներս հանդիպում ունեցան Հայկական գլխաւոր թերթերու խմբագիրներուն մասնակցութեամբ:
Ասուլիսի ընթացքին տեղեկութիւններ փոխանցեցան «Զինծառայողներու Ապահովագրութեան Հիմնադրամի» գործունէութեան եւ ծրագիրներու մասին:
«Հիմնադրամը» ստեղծուած է Հայաստանի Ազգային Ժողովի հաստատած օրէնքով` 2016 թուականի քառօրեայ պատերազմէն ետք, սակայն ան կը ղեկավարուի անկախ հոգաբարձական մարմինի մը կողմէ: Ըստ օրէնքի իւրաքանչիւր պաշտօնեայի աշխատավարձերէն 1000 դրամ կը փոխանցուի հիմնադրամին: Վերջին պատերազմէն ետք այդ 1000 դրամը բարձրացած է` ըստ աշխատավարձի չափի:
Հիմնադրամի ներկայացուցիչները տեղեկացուցին որ, 4582 շահառուներու, որոնց 4165-ը արձանագրուած են 44-օրեայ պատերազմէն յետոյ, հատուցում տրամադրուած է շուրջ 109,000,000 Ամերիկեան տոլար: Շահառուներու 86%-ը (3948) զոհուած հերոսներ են, 2%-ը (76)` անյայտ բացակայողներ, 12%-ը (558)` առաջին կամ երկրորդ կարգի հաշմանդամութիւն ունեցողներ:
Զոհուածներու ընտանիքներուն անմիջապէս կը տրուի 20 հազար տոլար, իսկ վիրաւորներուն` ամսական գումար` ըստ հաշմանդամութեան աստիճանին:
Իը հիմնադրութենէն ասդին Հիմնադրամը ստացած է շուրջ 23 միլիոն Ամերիկեան տոլար նուիրատուութիւն, որու 70%-ը ստացած է Հայաստանէն, մնացածը` աշխարհի աւելի քան 70 երկիրներէն: Այդ նուիրատուութիւններու մեծ մասը, բնականաբար հաւաքուած է Արցախեան վերջին պատերազմի ընթացքին եւ անկէ յետոյ: Մնացած գումարները կը գոյանան Հայաստանի եւ Արցախի բնակիչներու աշխատավարձներու պարտադիր վճարներէն:
«Զինծառայողներու Ապահովագրութեան Հիմնադրամի» ներկայացուցիչները կոչ կ’ընեն սփիւռքահայութեան` բերելու իրենց մասնակցութիւնը այս սրբազան նպատակին` փոքր կամ մեծ նուիրատուութիւններով:
Աւելի մօտէն ծանօթանալու համար Հիմնադրամի գործունէութեան եւ հաշուետուութեան կարելի է այցելել 1000plus.am կայքէջը:
