Արցախի նախագահ՝ Արայիկ Յարութիւնեան ընդունած է Ասկերանի շրջանի Աւետարանոց եւ Ակնաղբիւր գիւղերու խումբ մը բնակիչներ, յայտնած է Արցախի նախագահի աշխատակազմի տեղեկատուութեան վարչութիւնը:
Քննարկուած են տեղահանուած ընտանիքներու խնդիրները եւ անոնց համատեղ բնակութեան վայրի ընտրութեան հարցը:
Արայիկ Յարութիւնեան ընդգծած է նախընտրութիւնը, որ այդ գիւղերու բնակիչները վերաբնակեցուին համախումբ սկզբունքով: Երկու համայնքներու բնակիչներու հետ քննարկումներու ընթացքին նախանշուած են Ասկերանի շրջանի շարք մը վայրեր, որոնց վերջնական ընտրութիւնը պէտք է կատարեն բնակիչները՝ պետական լիազօր մարմիններու ներկայացուցիչներու հետ միասին: Այնուհետեւ կարճ ժամանակահատուածի ընթացքին կը կազմուին նոր բնակավայրերու նախագիծերն ու կը տրուի շինարարական աշխատանքներու մեկնարկը:
Հանդիպման մասնակցած են Արցախի տարածքային կառավարման եւ ենթակառուցուածքներու եւ քաղաքաշինութեան նախարարները, կալուածատուրքի եւ պետական գոյքի կառավարման պետական կոմիտէի ղեկավարը: