ՀՀ ազգային ժողովի «Իմ քայլը» խմբակցութեան ղեկավար՝ Լիլիթ Մակունցի կարծիքով՝ քաղաքացիներու կողմէն վարչապետին ուղղուած՝ թաւիշը վերացնելու պահանջքը առաջին հերթին կը վերաբերի դատական համակարգի մէջ փոփոխութիւններուն: «Արմէնփրէս»-ի հաղորդմամբ՝ Մակունցը նման տեսակէտ յայտնեց ԱԺ-էն ներս լրագրողներու հետ զրոյցի ընթացքին, անդրադառնալով հարցին, թէ ինչո՞ւ իշխանութիւնը իր տուած խոստումը չի կատարեր եւ որ քաղաքացիները փակած են մայրուղին՝ վարչապետէն պահանջելով վերացնել թաւիշը:
«Ես կարծում եմ, որ այդ արտայայտութիւնն առաջին հերթին վերաբերում է դատական համակարգում փոփոխութիւններին: Այստեղ քաղաքացիներն ունեն արդարադատութիւն իրականացնելու պահանջներ»,-ըսաւ խմբակցութեան ղեկավարը:
Ան միեւնոյն ժամանակ կարեւոր համարեց հասկնալ, թէ ինչ կը նշանակէ «թաւիշը վերացնել» արտայայտութիւնը: Մակունց յոյս յայտնեց, որ քաղաքացիները նկատի չունենան, օրէնքի դաշտէն դուրս ելլել, կատարել քայլեր, որոնք համատեղելի չեն օրէնքի եւ Սահմանադրութեան հետ:
Օրեր առաջ Գիւմրի-Երեւան ճանապարհին շարք մը համայնքներու բնակիչներ կանգնեցուցած էին վարչապետի շարասիւնը եւ աջակցութիւն յայտնած անոր՝ յորդորելով «վերացնել թաւիշը»:
