Միացեալ Նահանգներու Ներկայացուցիչներու Տան անդամներ` Ատամ Շիֆ եւ Ճէքի Սփիիր համատեղ յօդուած մը ստորագրած են «Սան Ֆրանսիսքօ Քրոնիքըլ» թերթին մէջ, ուր կոչ կ՛ընեն նախագահ Ճօ Պայտընին, որպէսզի ան օգտագործէ Ամերիկայի միջոցները Լեռնային Ղարաբաղի մէջ ժողովրդավարութեան եւ մարդկային իրաւունքներու հաստատման ուղղութեամբ:
«Անցած մի քանի շաբաթներու ընթացքին աշխարհը ականատես եղաւ ամերիկեան ժողովրդավարութեան յաղթանակին՝ ապագայ միապետի նկատմամբ, որ աւարտեցաւ Յունուար 20-ին իշխանութեան խաղաղ փոխանցմամբ: Այնուհանդերձ, Նախագահ Պայտընի առջեւ ծառացած արտասահմանեան եւ ներքին արտասովոր մարտահրաւէրները չէին կրնար աւելի ակնյայտ ըլլալ: Ան այժմ հնարաւորութիւն ունի վերափոխելու ԱՄՆ արտաքին քաղաքականութիւնը, որ նախագահ Տոնալտ Թրամփի օրօք հեռացած է մեր հիմնական ժողովրդավարական շահերէն եւ արժէքներէն», կը գրեն Քալիֆորնի նահանգէն ընտրուած ներկայացնող գոնկրէսականները:
Իրենց հիմնական հարցին անդրադառնալով Շիֆ եւ Սփիիր վերջին իրադարձութիւններու մասին մասնաւորապէս կը գրեն.
«Նախագահ Պայտընի համար վաղ քննութիւնը յայտնաբերուած է Հարաւային Կովկասի տարածաշրջանին մէջ գտնուող փոքր եւ յաճախ անտեսուած շրջանին, որ յայտնի է որպէս Լեռնային Ղարաբաղ:
«Լեռնային Ղարաբաղը վիճելի տարածք է, որ Խորհրդային Միութեան արիւնոտ եւ քաոսային վերջին օրերուն ստեղծուեցաւ որպէս Հայաստանին սերտ կապակցուած կիսանկախ ինքնավար մարզ եւ մօտ 150,000 բնակիչով: Արցախը, ինչպէս կը կոչուի Հայաստանի մէջ, գոյութիւն ունեցած է անհանգիստ վիճակի մէջ տասնամեակներ, շրջափակուած եւ բախուելով ատրպէյճանական ուժերու յաճախակի յարձակումներու, բայց այնքան խաղաղ, որ թոյլ տայ անոր բնակիչներուն աճիլ եւ կառուցել ծաղկող ժողովրդավարութիւն:
«Մինչեւ Սեպտեմբեր, տարիներ տեւած լարուածութենէն, տարածաշրջանի կարգավիճակի շուրջ պարբերաբար բռնութիւններէն եւ Ատրպէյճանի կառավարութեան կողմէ ռազմական ուժի յաճախակի սպառնալիքներէն եւ էթնիկական զտումներէ ետք, Ատրպէյճանը, Թուրքիոյ օժանդակութեամբ, սկսաւ լայնածաւալ յարձակումը՝ կործանարար հետեւանքներով: Վեցշաբաթեայ դաժան պատերազմի ընթացքին բարդ անօդաչու թռչող սարքերը օդէն թիրախաւորեցին հայ զինուորները, Թուրքիոյ կողմէ ուղարկուած վարձկանները՝ ամրացնելով ատրպէյճանական ցամաքային ուժերը, իսկ Ատրպէյճանը գերազանցեց հայկական պաշտպանողականութիւնը: Միջազգային բանակցութիւններու արդիւնքով հրադադարի ռեժիմը խախտելէ յետոյ Ատրպէյճանի ուժերը առաջ շարժուեցան մայրաքաղաք Ստեփանակերտէն մի քանի քիլոմեթր հեռաւորութեան վրայ, մինչեւ Ռուսաստանի միջնորդութեամբ կնքուած համաձայնագիրը աւարտեց մարտերը:
«Պայտըն յայտարարած է, որ կեդրոնանալու է Միացեալ Նահանգներու վերականգնման վրայ՝ որպէս ժողովրդավարութեան եւ մարդու իրաւունքներու ուժ ամբողջ աշխարհի տարածքին: Այս հակամարտութիւնն ու անոր հետեւանքները ճիշդ այդ ընելու հնարաւորութիւն կու տան»:
Նախագահ Պայտընի վարչակազմէն ակնկալուող հետագայ գայլերու մասին խօսելով երկու գոնկրէսականները կ՛առաջարկեն, որպէսզի Ամերիկան աշխուժացնէ եւ ակտիւօրէն ներգրաւուի Մինսկի խումբի գործընթացին եւ օգտագործէ հնարաւորութիւնը՝ ապահովելու համար Ատրպէյճանի կողմէ դեռ պահուող աւելի քան 150 հայ ռազմագերիներու վերադարձը, պահանջել պաշտպանել պատմական քրիստոնէական եկեղեցիներն ու մշակութային նշանակութեան վայրերը, լրացուցիչ մարդասիրական օգնութիւն տրամադրել տասնեակ հազարաւոր տեղահանուած մարդկանց, դադարեցնել մեր լռութիւնը Ատրպէյճանի եւ Թուրքիոյ տարածաշրջանային յարձակումներուն նկատմամբ եւ դադարեցնենք ռազմական օգնութիւնը Ատրպէյճանին, որ վերջին երկու տարուայ ընթացքին ընդհանուր առմամբ կազմած է աւելի քան 100 միլիոն տոլար:
Աւելցնելով, գոնկրէսականները կ՛ըսեն, որ մենք պէտք է նաեւ վերագնահատենք մեր յարաբերութիւնները Թուրքիոյ հետ, որ միշտ բարդ եղած է, բայց դարձած է աւելի ու աւելի անհնար, քանի որ Թուրքիոյ նախագահ Ռեջեփ Թայիփ Էրտողանը կուտակած է միապետական լիազօրութիւններ՝ միաժամանակ խարխլելով ԱՄՆ-ի շահերը:
Վերջապէս, կ՛ըսեն Ատամ Շիֆ եւ Ճէքի Սփիիր, նախագահ Պայտըն պէտք է ուժեղ կերպով եւ արագօրէն պաշտպանէ մարդու իրաւունքները՝ Ապրիլին ճանչնալով Հայոց ցեղասպանութիւնը:
