Հրանդ Տինքի անուան միջազգային մրցանակի այս տարուայ դափնեկիրը թուրք նշանաւոր հասարակական գործիչ՝ Օսման Քաւալան է:
Աւելի քան հազար օր ճաղերուն ետեւը գտնուող Քաւալան Սիլիվրիի բանտէն յղած իր ուղերձին մէջ նշած է. – « Կը հաւատամ, որ հասարակութեան տարբեր հատուածներու եւ տարբեր երկիրներու մէջ ապրող մարդոց միջեւ առկայ նախապաշարումները հնարաւոր է յաղթահարել մտածելով, խօսելով եւ լսելու միջոցով»:
Իր խօսքին մէջ Քաւալան յիշած է նաեւ բանտ գտնուող քուրտ քաղաքական գործիչ՝ Սելահաթտին Տեմիրթաշին, լրագրող, հրապարակախօս՝ Ահմետ Ալթանին, բանտարկուած միւս լրագրողներուն եւ հացադուլի հետեւանքով վերջերս մահացած փաստաբան՝ Էպրու Թիմթիքին:
Թուրքիայէն դուրս գործունէութիւն ծաւալող գործիչներէն՝ Տինքի անուան մրցանակին արժանացած է կանանց իրաւունքներու պաշտպանութեամբ զբաղող եգիպտացի աքթիւիսթ՝ Մուզն Հասանը:
«Նման արժէքաւոր մրցանակ ստանալը կ’իմաստաւորէ իմ վերապրած բոլոր դժուարութիւնները եւ կը յիշեցնէ առանց յուսահատելու պայքարը շարունակելու կարեւորութեան մասին»,-ոգեւորութեամբ նշած է Հասանը:
Արդէն 12-րդ անգամ Սեպտեմբեր 15-ին, Տինքի ծննդեան օրը տեղի ունեցող միջոցառումը այս տարի առցանց հարթակով կայացաւ: Արարողութեան ուղիղ եթերով հեռարձակումը «Ակօս»-ի նախկին խմբագրատան շէնքէն՝ «23,5»-էն էր, որ վերածուած է Հրանդ Տինքի յիշողութեան վայրի:
