Հայաստանի վարչապետ Նիկոլ Փաշինեանի եւ Արցախի նախագահ Արայիկ Յարութիւնեանի համանախագահութեամբ՝ Երեւանի մէջ տեղի ունեցած է Անվտանգութեան խորհուրդներու համատեղ նիստը:
«Ակնյայտ է, որ առանց Արցախի իշխանութիւնների լիարժէք ներգրաւման բանակցային գործընթացում չի կարող լինել էական առաջընթաց, քանի որ իւրաքանչիւր առաջընթացի համար անհրաժեշտ են կարեւորագոյն պայմանաւորուածութիւնների ձեռքբերման եւ իրացման կարողութիւն, եւ այստեղ է, որ Արցախի իշխանութիւնների ստացած ժողովրդական մանդատը (լիազօրագիրը) անփոխարինելի է:
Արցախի իշխանութիւնների ներգրաւումը բանակցութիւնների բովանդակային հարցերում առարկայական անհրաժեշտութիւն է, որից խուսափելն առաւել կը ձգձգէ առանց այն էլ ձգձգուած հակամարտութիւնը: Ակնյայտ է, որ հակամարտութեան կողմերն ունեն իրարամերժ դիրքորոշումներ առանցքային մի շարք հարցերում, եւ եթէ անկեղծ լինենք, ապա շատ աւելի հեշտ է ասել` որ հարցերում համաձայն չենք Ատրպէյճանի հետ, քան որ հարցերում կարող ենք համաձայնութեան հասնել», – ըսած է Նիկոլ Փաշինեան իր ելոյթին:
Ան շեշտած է, որ Ատրպէյճանը չի հրաժարիր առաւելապաշտական կեցուածքէն եւ կը դիտարկէ խաղաղ գործընթացը, որպէս իր բոլոր պահանջքներուն աստիճանական կատարման միջոց: «Այսինքն, ոչ թէ փոխզիջման հասնելու միջոց, այլ իր բոլոր պահանջների աստիճանական կատարման միջոց: Այդպէս չի լինում եւ չի լինելու, բանակցային գործընթացը մէկ կամ երկու ընդմիջում ունեցող պատուէրով համերգ չէ, խաղաղութիւնը ենթադրում է փոխզիջման հասնելու պատրաստակամութիւն եւ համապարփակ լուծումներ:
Հենց այդ պատրաստակամութիւնն ի նկատի ունենալով՝ ես առաջ էի քաշել այն բանաձեւը, որի համաձայն՝ Արցախի հարցի որեւէ լուծում պէտք է ընդունելի լինի Ղարաբաղի ժողովրդի համար, Հայաստանի ժողովրդի համար եւ Ատրպէյճանի ժողովրդի համար: Այս բանաձեւը ոչ այլ ինչ է, քան փոխզիջման հնարաւորութիւնն ընդունելու առաջարկ: Կրկնում եմ՝ հնարաւորութիւնն ընդունելու առաջարկ, այլ ոչ թէ յստակ փոխզիջման ընդունում, որը դեռեւս հեռու է ձեւաւորուած լինելուց իմ նշած պատճառներով:
Չընդունելով իմ առաջարկը՝ Ատրպէյճանի նախագահը չի ընդունում ընդհանրապէս որեւէ փոխզիջման հնարաւորութիւն: Եւ ուրեմն ակնյայտ է, որ մենք չենք կարող նման մօտեցումներով ակնկալել բանակցային գործընթացում իրական առաջընթաց, յատկապէս, երբ դրանք ուղեկցուում են պատերազմի սպառնալիքներով կամ հայ ժողովրդի հանդէպ տարածքային կամ պատմական ուղղակի կամ անուղղակի պահանջներով», – ընդգծած է Հայաստանի վարչապետը:
Միաժամանակ ան յայտարարած է, որ Հայաստանի եւ Արցախի միասնական անվտանգութեան համակարգը առաւել քան պատրաստ է պաշտպանելու հայ ժողովուրդի անվտանգութիւնը հայրենիքի իւրաքանչիւր հատուածի մէջ:
Արցախի նախագահ Արայիկ Յարութիւնեանն ալ նկատել տուած է, որ «Քորոնա» ժահրի անտեսանելի սպառնալիքի դէմ պայքարելով պէտք չէ թուլցնենք մեր զգօնութիւնը յատկապէս Ատրպէյճանէն բխող տեսանելի վտանգի հանդէպ: «Ատրպէյճանի իշխանութիւնները տասնամեակներ շարունակ գոյաբանական սպառնալիք են ներկայացնում ոչ միայն Արցախի, այլեւ՝ Հայաստանի ողջ բնակչութեան նկատմամբ: Կողմնակից լինելով ատրպէյճանա-ղարաբաղեան հակամարտութեան բացառապէս խաղաղ ճանապարհով կարգաւորմանը՝ մենք միեւնոյն ժամանակ հարկադրուած ենք ամէն օր պատրաստ լինել պատերազմի», – ըսած է նախագահը:
