Քսաներորդ դարու սպանացի մեծանուն նկարիչներ Սալուատոր Տալիի եւ Փապլօ Փիքասոյի բացառիկ ստեղծագործութիւնները Հայաստան պիտի բերէ «Art of the Nations» ֆոնտը:
Սիւրռէալիզմի (գերիրապաշտութեան) ականաւոր ներկայացուցիչներու ցուցահանդէսը պիտի բացուի Հայաստանի ազգային պատկերասրահին մէջ:
«Արմենբրես»-ի թղթակցի հետ զրոյցի ժամանակ «Art of the Nations» ֆոնտի տնօրէն Եարոսլաւ Շատրինն ըսած է, որ Հայաստանի ազգային պատկերասրահին մէջ պիտի ցուցադրեն Տալիի եւ Փիքասոյի քանդակները, սերամիքական եւ կրաֆիքական աշխատանքները:
«Արդէն պատկերասրահի հետ համաձայնագիր ունինք, եւ մօտակայ օրերս պաշտօնապէս պիտի յայտարարենք ցուցահանդէսի մանրամասները»,-շեշտած է Շատրինը:
Անոր խօսքով` ցուցահանդէսին ընդգրկուած է երկու մեծերու աւելի քան 200 աշխատանք: «Այն այցելուներու համար բաց պիտի ըլլայ մի քանի ամիս»,-շեշտած է ֆոնտի տնօրէնը:
Առիթով մը Շատրինն ըսած է, որ Տալին բարդ է, բարի, նուրբ ու լի կասկածներով: «Փիքասոյի կերպարն ինծի աւելի հարազատ է: Մեր տան մէջ անոր քանի մը աշխատանք կար: Կարծես տան մէջ եւս մէկ տղամարդ յայտնուած էր`ուժով լի, զօրաւոր: Ես չհանդուրժեցի եւ պատէն հանեցի այդ ստեղծագործութիւնները»,-խոստովանած է ֆոնտի տնօրէնը:
«Art of the Nations» ֆոնտի հաւաքածուն կը համարուի աշխարհի մէջ չորրորդն իր մեծութեամբ:
