ՀՀ կառավարութեան հերթական նիստին վարչապետ Նիկոլ Փաշինեանը անդրադարձած է ԱՄՆ Քոնկրէսի Ներկայացուցիչներու պալատին մէջ Հայոց ցեղասպանութեան ճանաչման բանաձեւի ընդունման:
«Կարծում եմ, որ սա շատ կարեւոր իրադարձութիւն է Հայոց ցեղասպանութեան ճանաչման գործում եւ, անշուշտ, նոր թափ կը հաղորդի այդ գործընթացին», – ըսած է ան:
Այս կապակցութեամբ վարչապետը իր գնահատանքի խօսքերը ուղղած է սփիւռքի մէջ, տուեալ պարագային՝ ԱՄՆ-ի մէջ գործող հայկական կազմակերպութիւններուն, որոնք տասնեակ տարիներ հետեւողականօրէն աշխատած են Հայոց ցեղասպանութեան ճանաչման հասնելու համար ԱՄՆ-ի եւ տարբեր երկիրներու մէջ:
«Գործնականում այս որոշումը երկար տարիներ հասունացել էր, որովհետեւ ԱՄՆ-ի գրեթէ բոլոր նահանգները նահանգային մակարդակում արդէն իսկ ճանաչել էին Հայոց ցեղասպանութիւնը, ու սա դարձաւ այդ գործընթացի գագաթնակէտն ու բարձրակէտը», – շեշտած է Նիկոլ Փաշինեանը:
Ան նաեւ շնորհակալութիւն յայտնած է ԱՄՆ Ներկայացուցիչներու պալատի հայկական խումբի եւ Ներկայացուցիչներու պալատի բոլոր այն անդամներուն, որոնք կողմ քուէարկած են Հայոց ցեղասպանութիւնը ճանչցող բանաձեւին։
Յիշեցնենք, որ Հոկտեմբեր 30-ին ԱՄՆ Ներկայացուցիչներու տունը ձայներու գերակշիռ մեծամասնութեամբ ճանչցած է մէկուկէս միլիոն հայերու ցեղասպանութիւնը Օսմանեան կայսրութեան մէջ: Օրէնսդիր մարմնի երկու ճամբարներու` հանրապետականներու եւ դեմոկրատներու հեղինակած թիւ 296 բանաձեւը ընդունուած է 405 կողմ, 11 դէմ ձայներով:
