Հատուածներ Վարչապետ Նիկոլ Փաշինեանի ՄԱԿ-ի ամպիոնէն արտասանած խօսքէն
Ժողովրդավարութեան մասին
«Պէտք է ապացուցենք, որ ժողովրդավարական վերափոխումը Հայաստանի մէջ անշրջելի է». Նիկոլ Փաշինեան
«Մենք ունենք անկոտրում վճռականութիւն՝ առաջ մղելու ժողովրդավարութիւնն ու բարեփոխումները մեր երկրում», – յայտարարած է Հայաստանի վարչապետ Նիկոլ Փաշինեանը՝ Չորեքշաբթի օր ելոյթ ունենալով ՄԱԿ-ի Գլխաւոր վեհաժողովի 74-րդ նստաշրջանին: «Այն հիմնուած է մեր ժողովրդի ծանրակշիռ մանտաթի վրայ, որին մենք պատասխանատու ենք բարեփոխումներ իրականացնելու, արդարութեան ապահովման, տնտեսական եւ ընկերային պայմանների բարելաւման եւ մեր ազգի զարգացման գործում», – ընդգծած է Փաշինեանը:
«ՄԱԿ-ի Գլխաւոր վեհաժողովում իմ վերջին յայտարարութիւնից ի վեր մեր երկրում ահռելի փոփոխութիւններ են տեղի ունեցել: …Անցեալ տարի տեղի ունեցած իրադարձութիւնների արդիւնքում միջազգային ԶԼՄ-ները Հայաստանն անուանեցին համաշխարհային ժողովրդավարութեան յոյս: Ի գիտութիւն ընդունելով մեր ժողովրդավարական նուաճումները՝ The Economist-ը Հայաստանը հռչակեց տարուայ երկիր», – նշած է Հայաստանի վարչապետը:
Միաժամանակ, անոր խօսքով, «ժողովրդավարական բարեփոխումների նկատմամբ երկրի ներսում կայ որոշակի դիմադրութիւն նախկին քորումփացուած վերնախաւի կողմից, որը փորձում է խոչընդոտել նոր կառավարութեան որդեգրած քորուփցիայի դէմ զրօ հանդուրժողականութեան քաղաքականութեանը»․ – «Նրանք փորձում են խուսափել արդարադատութիւնից՝ օգտագործելով իրենց նիւթական միջոցները եւ մարտահրաւէր նետելով մեր ժողովրդավարական նուաճումներին եւ ժողովրդավարական եղանակով ընտրուած Հայաստանի կառավարութեանը, որը չի իրականացրել գոյքի եւ սեփականութեան վերաբաշխում»:
«Հայկական ոչ բռնի, թաւշեայ յեղափոխութիւնն ապացուցեց, որ ժամանակակից աշխարհում հնարաւոր են ժողովրդավարական փոփոխութիւններ: Բայց յեղափոխութիւնը մեր առաքելութեան սկիզբն էր միայն եւ թերեւս՝ դրա ամենադիւրին փուլը: Ներկայում մենք գտնւում ենք առաքելութեան մէկ այլ, առաւել կարեւոր եւ դժուարին փուլում: Մենք պէտք է ապացուցենք, որ ժողովրդավարական վերափոխումը Հայաստանում անշրջելի է», – նշած է Փաշինեանը:
Թուրքիոյ մասին
«Թուրքիան կը շարունակէ մնալ անվտանգութեան լուրջ սպառնալիք հայ ժողովուրդի համար»
Ապա Փաշինեանը յայտարարած է․ – «Ցաւօք, մեր մոլորակը բոլորիս համար աւելի ապահով վայր չդարձաւ այս տարի: Դժուար է գտնել աշխարհի որեւէ տարածաշրջան, որն ինքնին ապակայունացուած չէ կամ չի տուժել հարեւան տարածաշրջանի լարուածութեան հետեւանքով: Հայաստանի 4 սահմաններից 2-ը, այդ թւում` Թուրքիայի հետ սահմանը, փակ է արդէն շուրջ երեք տասնամեակ: Հրաժարուելով Հայաստանի հետ դիւանագիտական յարաբերութիւններ հաստատելուց, Ատրպէյճանին աջակցելով ընդդէմ Հայաստանի եւ Լեռնային Ղարաբաղի՝ Թուրքիան շարունակում է մնալ անվտանգութեան լուրջ սպառնալիք հայ ժողովրդի համար, ով արդէն մէկ անգամ եղել է ցեղասպանութեան զոհ եւ ականատեսն է պատմական ճշմարտութեան ժխտման եւ կատաղի դիմադրութեան»:
Արցախի մասին
«Ատրպէյճանի իշխանութիւնները կը ցանկան յաղթել Լեռնային Ղարաբաղի ժողովուրդին»
Վարչապետը խօսած է Արցախեան հիմնախնդրի մասին՝ ըսելով․ – «Լեռնային Ղարաբաղի հակամարտութեան խաղաղ կարգաւորումն առանցքային նշանակութիւն ունի մեր տարածաշրջանի կայունութեան եւ անվտանգութեան համար: Իմ պաշտօնավարման առաջին իսկ օրուանից ես քայլեր եմ ձեռնարկել հենց այս ծիրէն ներս: Այս նպատակով, ես հանդէս եկայ յայտարարութեամբ, որում ասւում է, որ Լեռնային Ղարաբաղի հակամարտութեան ցանկացած լուծում պէտք է ընդունելի լինի Հայաստանի, Լեռնային Ղարաբաղի եւ Ատրպէյճանի ժողովուրդների համար…Ես հաւատում եմ, որ դա հակամարտութեան խաղաղ լուծման բանալին է, քանի որ այն ենթադրում է փոխզիջման, փոխադարձ յարգանքի եւ հաւասարակշռութեան հնարաւորութիւն»:
«Ես այդ բանաձեւը ներկայացրեցի ոչ միայն հանրութեանը, այլեւ ԵԱՀԿ Մինսքի խմբի համանախագահութեան ներքոյ անցկացուող բանակցութիւնների շրջանակում: Առաջ ընթանալու համար ես ակնկալում էի նման յայտարարութիւն նաեւ Ատրպէյճանից: Այնուամենայնիւ, Ատրպէյճանի բարձրագոյն իշխանութիւնները մնացին իրենց դիրքորոշմանը՝ ձգտելով ղարաբաղեան հիմնախնդրի այնպիսի լուծման, որն ընդունելի կը լինի միայն Ատրպէյճանի ժողովրդի համար», – ընդգծած է Փաշինեանը՝ յաւելելով․ – «Ի՞նչ է դա նշանակում իրականում: Դա նշանակում է, որ Ատրպէյճանի իշխանութիւնները մտադրութիւն չունեն լուծել այս հակամարտութիւնը: Փոխարէնը, նրանք ցանկանում են յաղթել Լեռնային Ղարաբաղի ժողովրդին: Նրանք չեն ցանկանում գնալ որեւէ փոխզիջման: Նրանց նպատակը վրէժխնդրութիւնն է 1990-ականներին եւ 2016 թուականին Լեռնային Ղարաբաղի ժողովրդի դէմ թշնամանքի անյաջող փորձի համար: Այդ իսկ պատճառով նրանք բորբոքում են հակահայկական տրամադրութիւններ իրենց ժողովրդի մէջ, այդ պատճառով նրանք հսկայական միջոցներ են ծախսում սպառազինութեան վրայ, այդ իսկ պատճառով հայատեացութիւնն արդէն դարձել է Ատրպէյճանի պաշտօնական քաղաքականութիւնը»:
