Եւրախորհուրդի Վենետիկի յանձնաժողովը պատրաստ է խորհրդատուական կարծիք (amicus curiae opinion) տրամադրելու Երեւանի առաջին ատեանի ընդհանուր իրաւասութեան դատարանի եւ Հայաստանի երկրորդ նախագահ Ռոպերթ Քոչարեանի դիմումներու հիման վրայ Սահմանադրական դատարանի կողմէ քննութեան ընդունուած գործերով: Այդ մասին Օգոստոս 20-ին Սահմանադրական դատարանի նախագահ Հրայր Թովմասեանին հասցէագրուած գրութեամբ յայտնած է Վենետիկի յանձնաժողովի տնօրէն-քարտուղար Թոմաս Մարքերթը, ըսուած է Սահմանադրական դատարանի աշխատակազմի այսօրուայ հաղորդագրութեան մէջ:
Նախկին նախագահի գործով խորհրդատուական կարծիք ստանալու համար Սահմանադրական դատարանը Մարդու իրաւունքներու եւրոպական դատարան եւ Վենետիկի յանձնաժողով դիմած է Յուլիս 18-ին՝ կասեցնելով Քրէական օրէնսգիրքի 300,1-րդ յօդուածի՝ Սահմանադրութեան համապատասխանութեան հարցը որոշելու վերաբերեալ գործերու վարոյթները: Օգոստոսի սկիզբը հաղորդուած էր, որ Եւրոպական դատարանը ստացած է Սահմանադրական դատարանի դիմումը եւ այն պիտի քննարկէ առաջնահերթութեան կարգով:
Երեւանի դատարանի դատաւոր Դաւիթ Գրիգորեանը Մայիսի 20-ին կասեցուցած էր Մարտ 1-ի քրէական գործի վարոյթն ու այն ուղարկած Սահմանադրական դատարան։ Գրիգորեանը բարձր դատարանէն խնդրած էր որոշել Ռոպերթ Քոչարեանին մեղսագրուող՝ սահմանադրական կարգը տապալելու մասին յօդուածի սահմանադրականութիւնը եւ նախագահի անձեռնմխելիութեան հիմնարկի էութիւնը։