Վարչապետ Նիկոլ Փաշինեան եւ տիկին Աննա Յակոբեան Փեքինի Ազգային ողիմպիական մարզադաշտին մէջ ներկայ գտնուած են «Ասիական քաղաքակրթութիւններու երկխօսութիւն» համաժողովի կալա համերգին: Ձեռնարկին ներկայ եղած են նաեւ Չինաստանի Ժողովրդական Հանրապետութեան նախագահ Սի Ծինփինը, Սինկափուրի, Սրի Լանքայի, Յունաստանի նախագահները եւ Գամպոտիայի թագաւորը: Բացման խօսքով հանդէս եկած է ՉԺՀ նախագահ Սի Ծինփինը եւ ջերմօրէն ողջունած ներկաներուն:
Կալա համերգի ընթացքին «Ասիական քաղաքակրթութիւններու երկխօսութիւն» համաժողովի մասնակից քանի մը տասնեակ պետութիւններու ներկայացուցիչները հանդէս եկած են կատարումներով` ներկայացնելով իրենց ազգային մշակոյթը: Ձեռնարկին ընթացքին ելոյթ ունեցած է նաեւ Հայաստանի պարարուեստի «Բարեկամութիւն» պետական համոյթը Հայկական Քոչարի պարով:
«Երեկոյեան արդէն մեր Քոչարին հեռարձակուեց չինական ամենախոշոր հեռուստաընկերութիւններից մէկի՝ CCTV-ի եթերում», – ֆէյսպուքեան իր էջին տեղադրուած տեսանիւթը մակագրած է Աննա Յակոբեանը։
«Ասիական քաղաքակրթութիւններու երկխօսութիւն» համաժողովի մասնակիցներու թիւը կ՛անցնի 2 հազարը` աշխարհի 47 երկրէ: Համաժողովին նպատակն է ամրապնդել Ասիական տարածաշրջանի պետութիւններու կապերը, ներառեալ` տնտեսական, խորացնել համագործակցութիւնը տարբեր ուղղութիւններով:
