Երեւանի ընդհանուր իրաւասութեան Նոր Նորքի դատարանին մէջ` դատաւոր Դաւիթ Գրիգորեանի նախագահութեամբ, տեղի ունեցած է ՀՀ երկրորդ նախագահ Ռոպերթ Քոչարեանի գործով դատավարութիւնը։ Նիստին քննարկուած է անոր նկատմամբ ընտրուած խափանման միջոցի՝ կալանաւորման հիմնաւոր ըլլալ-չըլլալու հարցի քննութիւնը, կը տեղեկացնէ «Փաստինֆօն»:
Նիստին մասնակցած է ՀՀ երկրորդ նախագահը, որուն դիմաւորած են ծափողջոյններով։
Ներկայ եղած է նաեւ գործով մեղադրեալ Եուրի Խաչատուրովի պաշտպան Միհրան Պօղոսեանը:
Մեղադրանքը դատարանին մէջ կը պաշտպանեն դատախազներ Պետրոս Պետրոսեանը, Երեւան քաղաքի գլխաւոր դատախազ Բիշարեանը, ՀՀ գլխաւոր դատախազ Արթուր Դաւթեանը:
Դատարանը օրուայ աւարտին անցած է խորհրդակցական սենեակ՝ Քոչարեանի պաշտպաններու ներկայացուցած ինքնաբացարկի միջնորդութեան վերաբերեալ որոշում կայացնելու։
Դատաւոր Դաւիթ Գրիգորեանը որոշումը պիտի հրապարակէ 14 Մայիսին։
Դատավարութեան Ընթացքին Տեղի Ունեցած են Հակադիր Ցոյցեր
Ռոպերթ Քոչարեանի նկատմամբ դատավարութիւնը ուղեկցուած է Քոչարեանի խումբ մը աջակիցներու բողոքի ցոյցով՝ «Ազատութիւն Ռոպերթ Քոչարեանին» պաստառներով եւ վանկարկումներով:
Ցուցարարներու ու քաղաքացիական աքթիւիսթ Վարդգէս Գասպարիի միջեւ միջադէպ տեղի ունեցած է. վերջինս եկած էր «Ռոպիկ մարդասպան» պաստառով, ինչը վրդովեցուցած էր Քոչարեանի աջակիցները: Քաշքշուկ սկսած էր, երկրորդ նախագահի աջակիցները աքթիւիսթի ձեռքէն խլած են պաստառը, անոնցմէ մէկը շիշով հարուածած է Գասպարիի դէմքին:
Ոստիկանները դատարանի միջանցքէն դուրս հանած են միջադէպի մասնակիցները: Վարդգէս Գասպարին անգործութեան մէջ մեղադրած է ոստիկանութեան ներկայացուցիչները՝ իր նկատմամբ բռնութիւնը չկանխելու համար:
Իսկ Քոչարեանի աջակիցներէն Սերկէյ Սարժումեանը խոստովանած է, որ պաստառը ինք խլած է, աւելցնելով, որ իրենք թոյլ չեն տար, որ նման պաստառներով գան այստեղ ու խախտեն անմեղութեան կանխավարկածը:
