Թուրքիոյ նախագահ Ռեճէպ Թայէպ Էրտողանը իշխող «Արդարութիւն եւ զարգացում կուսակցութեան» (ԱԶԿ-AKP) ժողովին ժամանակ անդրադարձած է Հայոց Ցեղասպանութեան հարցին՝ ներկայացնելով արխիւները բանալու թրքական հերթական կոչերը։ Այս մասին կը հաղորդէ Ermenihaber.am-ը:
«Հայերու տեղահանութիւնը ոչ ցեղասպանութիւն էր, ոչ ալ մեծ աղէտ։ Անիկա սոսկ ցաւալի իրադարձութիւն մըն էր, որ տեղի ունեցած է մէկ դար առաջ շատ ծանր պայմաններուն մէջ»,- յայտարարած է Էրտողանը, ապա անդրադարձած Թուրքիան մեղադրողներուն:
«Թուրքիան մեղադրողներուն յիշեցնենք, որ անոնք պատասխանատու են 1-ին եւ 2-րդ համաշխարհային պատերազմներուն զոհուած 70 միլիոն մարդոց համար։ Ֆրանսայի նախագահ Էմանուէլ Մաքրոնը պէտք է լաւ գիտնայ ատիկա։ Պարոն Մաքրոն, Ֆրանսայի մէջ ապրող շուրջ 700 հազար հայերուն ուղերձ յղելը բնաւ պիտի չփրկէ քեզ։ Քաղաքականութեան մէջ նախ սորվիր ազնիւ ըլլալ»,- յորդորած է Թուրքիոյ նախագահը:
Յիշեցնենք, որ Ապրիլ 24-ին Էրտողանը յայտարարած էր, որ հայերու տեղահանութիւնը ամենաողջամիտ որոշումը եղած է այդ ժամանակաշրջանին համար։ Հայաստանի վարչապետ Նիկոլ Փաշինեան եւ արտաքին գործոց նախարարութիւնը խստօրէն դատապարտած են Թուրքիոյ նախագահի վերոյիշեալ յայտարարութիւնը։