Անատոլու գործակալութիւնը կը հաղորդէ, որ թրքական իշխանութիւնները կը պատրաստուին վերականգնել Տիարպէքիրի Սուրբ Կիրակոս հայկական եկեղեցին:
Պատմական Սուր շրջանին մէջ շուրջ 4 տարի առաջ թրքական ուժայիններու եւ քիւրտ զինեալներու միջեւ տեղի ունեցած բախումներու հետեւանքով մեծապէս տուժած էին շրջակայ պատմական կառոյցները: Անոնց մէկ մասը վերականգնուած էր պետական աջակցութեամբ, սակայն Հայկական Սուրբ Կիրակոսի եւ քաղդէական Մառ Պետյուն եկեղեցիներու վերանորոգումը հնարաւոր չէր եղած համայնքային հիմնադրամներու միջոցներու սղութեան պատճառով:
Հիմնադրամներու ղեկավարութեան դիմումին համաձայն Շրջակայ միջավայրի եւ քաղաքաշինութեան նախարարութիւնը որոշած է ֆինանսաւորել այդ երկու եկեղեցիներու վերակառուցումը: Կը նախատեսուի, որ համապատասխան աշխատանքները մեկնարկէն արդէն յաջորդ ամիս:
Սուր վարչական շրջանի ղեկավար Ապտուլլահ Չիֆթչին Անատոլու գործակալութեան յայտնած է, որ պետութիւնը պիտի հոգայ հայկական եւ քաղդէական եկեղեցիներու վերականգնման ծախսերը․ – «Այլ կրօններուն պատկանող արժէքները կը համարենք նաեւ մերը եւ աշխատանքներ կը տանինք անոնց պահպանման ուղղութեամբ: Այդ կառոյցները եւս մեր քաղաքակրթութեան համար կարեւորութիւն ունին ու յարգանքի արժանի են: Պետութիւնը ամբողջութեամբ պիտի վերականգնէ եկեղեցիները եւ պիտի բանայ այցելուներու համար»:
Հիմնադրամներու տարածքային վարչութեան նախագահ Մեթին Էվսէնը թրքական լրատուամիջոցներուն պատմած է, որ այս ընթացքին եւս երկու հայկական եկեղեցի վերականգնուած է, այդ աշխատանքներուն համար ծախսուած է շուրջ 10 միլիոն լիրա: Անոր խօսքերով, նախորդ տարի աւարտած է Տիարպէքիրի հայկական բողոքական եկեղեցւոյ վերականգնումը, իսկ հայկական կաթոլիկ եկեղեցւոյ վերակառուցումը պիտի շարունակուի մինչեւ տարեվերջ:
Մերձաւոր Արեւելքի ամենամեծ հայկական եկեղեցին` Սուրբ Կիրակոսը, կառուցուած է 1376 թուականին: Առաջին համաշխարհային պատերազմի տարիներուն այն եղած է գերմանական բանակի շտապը, այնուհետեւ Սիւմէր բանկի կողմէն օգտագործուած է որպէս բամբակի պահեստ: 1960-էն մինչեւ 1980 թուականը եկեղեցին գործած է, սակայն յետագայ տարիներու ընթացքին անխնամ մնալու հետեւանքով աւերուած է:
2008 թուականին եկեղեցւոյ հիմնադրամի, Տիարպէքիրի քաղաքապետարանի եւ շարք մը բարերարներու ջանքերով սկսած էր Սուրբ Կիրակոսի վերանորոգման աշխատանքները եւ 2011-ի վերջը այն կրկին բացուած էր հաւատացեալներու համար:
