Արայիկ Յարութիւնեանը յայտարարած է, որ 21 Փետրուարէն, իր դիմումին համաձայն, կը հեռանայ Արցախի նախագահի խորհրդականի ու յատուկ յանձնարարութիւններու գծով ներկայացուցիչի պաշտօնէն ու կը սկսի «կուսակցական շինարարութեան աւելի բուռն աշխատանք ծաւալել»:
Ֆէյսպուքեան իր էջին մէջ կատարած գրառմամբ, Յարութիւնեանը տեղեկացուցած է, որ իր որոշումը պայմանաւորուած չէ Արցախի նախագահի հետ որեւէ տարաձայնութեամբ, կամ խնդրով:
«Աւելին, ես իմ երախտագիտութիւնն եմ յայտնում նախագահ Սահակեանին, ով 2007-ից հնարաւորութիւն ընձեռեց աւելի քան 11 տարի ծառայելու մեր երկրին ու ժողովրդին», – գրած է Յարութիւնեանը։
Ղարաբաղի նախկին վարչապետը նաեւ տեղեկացուցած է, որ իր գլխաւորած քաղաքական ուժը «մինչեւ Բակօ Սահակեանի կառավարման ժամկէտի աւարտը շարունակելու է պաշտպանել նրա վարած քաղաքական քուրսը»։
Յարութիւնեանը աւելի վաղ յայտնած էր, որ 2020 թուականի նախագահական ընտրութիւններուն իր մասնակցութեան վերաբերեալ որոշում պիտի կայացնէ՝ հաշուի առնելով իր ղեկավարած կուսակցութեան՝ «Ազատ հայրենիքի» որոշումը։