Մարալիկի տարածաշրջանին մէջ՝ Մարալիկէն դէպի Բարձրաշէն լեռնային հատուածին մէջ, Հայաստանի Զինուած ուժերու ՍՈւ-25 մարտական օդանաւ կործանուած է, երկու օդաչուները՝ փոխգնդապետ Արմէն Բաբայեանը եւ գնդապետ Մովսէս Մանուկեանը զոհուած են:
Ամենօրեայ մարտական պատրաստութեան ծրագրով ուսումնամարզական թռիչք իրականացնող օդանաւը, պաշտպանութեան նախարարութեան հաղորդագրութեան համաձայն, թռիչքային երթուղի դուրս եկած էր ժամը 10:06-ին‘ Գիւմրիի օդակայանէն, ժամը 10:20-ի սահմաններուն կապը օդանաւի հետ կորսուած էր:
Քանի մը ժամ շարունակուած որոնողա-փրկարարական աշխատանքներէն ետք պաշտպանութեան նախարարութեան խօսնակ Արծրուն Յովհաննիսեանը Ֆէյսպուքի իր էջին գրած է, որ վթարի վայրը յայտնաբերուած է՝ այն Մարալիկի տարածաշրջանի լեռներուն մէջ է:
Աւելի ուշ պաշտպանութեան նախարարութիւնը հաղորդագրութիւն տարածած է, ուր ըսուած է՝ – «Աւիապատահարի հետեւանքով զոհուել են առաջին կարգի օդաչու, փոխգնդապետ Արմէն Սլավիկի Բաբայեանը եւ երրորդ կարգի օդաչու, գնդապետ Մովսէս Գէորգի Մանուկեանը»: Նախարարութիւնը խորապէս ցաւակցած է զոհուած փորձառու օդաչուներու ընտանիքներու անդամներուն, հարազատներուն ու ծառայակիցներուն:
Գլխաւոր դատախազութեան լրատուական ծառայութենէն ՚Ազատութեանՙ փոխանցած են, որ մարտական օդանաւի կործանման փաստի առթիւ յարուցուած է քրէական գործª թռիչքներու կամ անոնց նախապատրաստման կամ շահագործման այլ կանոնները խախտելու յատկանիշներով, որ անզգուշութեամբ յանգեցուցած է երկու կամ աւելի մարդու մահուան:
