Աւելի քան մէկ ամիս է՝ Հոլանտայի բողոքական եկեղեցին օր ու գիշեր, շաբաթուան մէջ եօթ օր՝ առանց դադարի, կրօնական ծէս ու պատարագ կը մատուցէ յանուն փախստական հայ ընտանիքի մը, որ կանգնած է արտաքսման վտանգի առաջ:
Հոկտեմբերի վերջէն Թամրազեանները՝ երեք երեխաներու հետ, եկեղեցւոյ ձեղնայարկին մէջ պատսպարուած են՝ ստիպուած, քանի որ դատարանը մերժած է երկրի մէջ օրինական բնակելու անոնց դիմումը: Տեղական լրատուամիջոցները կը գրեն՝ ոստիկանները արտաքսման հրամանը ձեռքին կը հերթապահեն եկեղեցւոյ դռներուն մօտ, սակայն, չեն կրնար ներս մտնել, քանի որ օրէնքը կ’արգիլէ անոնց աղօթքի ու պատարագի ժամանակ ձերբակալութիւններ իրականացնել:
Ընտանիքի ամենափոքրը՝15-ամեայ Սէյրանը, մէկ ամիս է՝ դպրոց չէ գացած: – «Եկեղեցւոյ մէջ ըլլալով, կը մտածեմ` ի՞նչ գործ ունիմ այստեղ: Բայց եթէ այստեղէն դուրս գանք, ամէն պահ կրնան մեզի ձերբակալել», – ըսած է ան:
Իրաւապահներու մուտքը կանխելու եւ շուրջօրեայ ծէսեր կազմակերպելու համար բողոքական փոքրիկ եկեղեցին դիմած է Հոլանտայի ու ողջ աշխարհի քրիստոնեաներուն: Արձագանգը չէ ուշացած. Հաակա եկած են հոգեւորականներ Հոլանտայի տարբեր շրջաններէն, Ֆրանսայէն, Իտալիայէն, Սպանիայէն: Ու հիմա անոնք կամաւորութեան սկզբունքով՝ երկու ժամը մէկ կը փոխարինեն իրար եկեղեցւոյ խորանին մօտ, որպէսզի պատարագը ոչ մէկ վայրկեան չդադարի:
Ընտանիքի հայրը՝ Սասունը, կնոջ եւ երեք երեխաներուն հետ Հոլանտա տեղափոխուած է ինը տարի առաջ՝ Մարտի 1-ի արիւնալի դէպքերէն ետք: Կը պնդէ, թէ այդ տարիներուն Հայաստանի մէջ հետապնդման ենթարկուած է իր քաղաքական հայեացքներուն համար:
Հոլանտայի իշխանութիւնը կը փաստարկէ՝ Հայաստանը հիմա անվտանգ երկիր է, ընտանիքը կրնայ անարգել հայրենիք վերադառնալ: 15-ամեայ Սեյրանը, սակայն, որ ծննդավայր Հայաստանէն գրեթէ ոչինչ կը յիշէ, կը խոստովանի՝ Հոլանտան դարձած է իր երկրորդ հայրենիքը, որմէ դուրս կեանքը դժուար կը պատկերացնէ:
