Վերջին տարիներու ընթացքին առաջին անգամ 2018-ին Հայաստանի պետական պարտքը պիտի նուազի եւ այդ նուազման միտումը պիտի շարունակուի նաեւ գալիք երկու տարիներուն` այս կանխատեսումը եղած է Համաշխարհային դրամատան օրերս հրապարակած զեկոյցին մէջ:
«Հայեացք մաքրօաղքատութեան» (Macro Poverty Outlook) անուամբ զեկոյցի համաձայն, եթէ 2015-2017-ին Հայաստանի պետական պարտքը շարունակ աճած է՝ 2017-ի վերջին կազմելով երկրի ողջ տնտեսութեան՝ համախառն ներքին արդիւնքի 58.9 տոկոսը, ապա այս տարուընէ սկսած այն պիտի նուազի: 2018-ին պետական պարտքը պիտի կազմէ Համախառն ներքին արդիւնքի (ՀՆԱ) 56.6 տոկոսը, 2019-ին՝ 55.4 տոկոսը, իսկ 2020-ին ՝ 55 տոկոսը:
Հայաստանի Ֆինանսներու նախարարութեան տուեալներով, այս տարուան 30 Սեպտեմբերի դրութեամբ երկրի պետական պարտքը կազմած է 6 միլիառ 740 միլիոն տոլար, ինչը 2017-ի վերջի համեմատ պակաս է գրեթէ 35 միլիոն տոլարով: Համեմատութեան համար նշենք, որ Հանրապետական կուսակցութեան առաջնորդ Սերժ Սարգսեանի նախագահութեան տարիներուն՝ 2008-2018 թուականներուն, Հայաստանի պետական պարտքը աճած է աւելի քան 3.5 անգամ: Ըստ Ազգային վիճակագրական կոմիտէի եւ Ֆինանսներու նախարարութեան, 10 տարի առաջ՝ 2008-ի վերջը, Հայաստանի պետական պարտքը կը կազմէր մօտ 1.9 միլիառ տոլար: Վարչապետի պաշտօնէն Սերժ Սարգսեանի հրաժարականի ժամանակ՝ այս տարուան ապրիլին, պետական պարտքը կը կազմէր 6 միլիառ 867 միլիոն տոլար:
Համաշխարհային պանքի զեկոյցը ՀՆԱ-ի համեմատ պետական պարտքի նուազումը կը ապէ յառաջիկայ տարիներուն երկրի տնտեսութեան շարունակական աճի հետ, որ այս տարի կը կանխատեսուի 5.3 տոկոս, 2019-ին՝ 4.3 տոկոս, իսկ 2020-ին՝ 4.6 տոկոս:
«2018 Ապրիլ-Մայիսին տեղի ունեցած խաղաղ յեղափոխութիւնը խոչընդոտ չհանդիսացաւ Հայաստանի մաքրօտնտեսական ցուցանիշների դրական միտումների համար: Հայաստանի տնտեսութիւնն, ընդհանուր առմամբ, շարունակում է դրական պատկեր ունենալ»,- կը փաստէ Համաշխարհային դրամատան զեկոյցը, ուր նաեւ մատնանշուած են այն ռիսքերը, որոնք կրնան ազդել երկրի տնտեսութեան վրայ՝ Հայաստանի համար կարեւոր առեւտրատնտեսական գործընկեր երկիրներու մէջ՝ Ռուսաստանի, Իրանի մէջ տնտեսական աճի դանդաղումը, պղինձի միջազգային գիներու անկումը, ներքին քաղաքական ռիսքերը:
«Հետազօտական ներուժի կովկասեան կեդրոն –Հայաստան»-ի գործադիր տնօրէն, տնտեսագիտութեան դոկտոր Հեղինէ Մանասեանը «Ազատութեան» հետ զրոյցի ժամանակ ուշադրութիւն հրաւիրած է այն հանգամանքին, որ տարուան սկիզբի համեմատ թէ՛ Համաշխարհային դրամատունը, թէ՛ Արժոյթի միջազգային հիմնադրամը հայաստանեան տնտեսութեան աւելի բարձր աճ կանխատեսած են:
Սակայն, ըստ տնտեսագէտին, նման աճը, անշուշտ, չի կրնար լուծել երկրի մէջ առկայ ընկերային-տնտեսական խնդիրները․- «Մեր տնտեսական աճը պէտք է գոնէ տարեկան երկնիշին մօտ թիւ լինի, որպէսզի մենք կարողանանք փոքրիշատէ էական տեղաշարժ գրանցել զարգացումներում, որովհետեւ մենք բազմաթիւ սոցիալական հարցեր ունենք, այդ սոցիալական հարցերը լուծելու աղբիւրը, այո՛, տնտեսական աճն է: Տնտեսական աճը հնարաւոր է, եթէ կան ներդրումներ, եթէ կան նոր աշխատատեղեր»:
