Home Uncategorized ժողովրդավարութիւնը Մեզ Համար Համոզմունք է եւ Արժէքային Համակարգ. Փաշինեան

ժողովրդավարութիւնը Մեզ Համար Համոզմունք է եւ Արժէքային Համակարգ. Փաշինեան

by MassisPost

«Ատրպէյճանն իր գործողութիւններով կը խաթարէ խաղաղ կարգաւորման մթնոլորտը»,- Պրիւքսէլի մէջ Հայաստանցի լրագրողներու հետ զրոյցի ընթացքի յայտարարեց Հայաստանի վարչապետ Նիկոլ Փաշինեանը, ընդգծելով՝ «եթէ խօսւում է խաղաղ կարգաւորման մասին, ապա միջազգային հանրութիւնը պէտք է աջակցի համապատասխան մթնոլորտի ձեւաւորմանը, հակառակ դէպքում, այս մթնոլորտում հնարաւոր չէ խօսել խաղաղ կարգաւորման մասին։Շատ է խօսւում Ղարաբաղի հարցի կարգաւորման մասին, եւ ես հարկ եմ համարում ընդգծել, որ Ղարաբաղի հարցի խաղաղ կարգաւորման համար անհրաժեշտ է համապատասխան մթնոլորտ, այսինքն՝ խաղաղ կարգաւորման մթնոլորտ, եւ ընդգծում եմ, որ Ատրպէյճանն իր գործողութիւններով խաթարում է խաղաղ կարգաւորման մթնոլորտը, եւ այդ իմաստով խաղաղ կարգաւորման կոչերը մի տեսակ կոնթեքստից կտրուած են կարծես: Եւ իմ արձագանգը մեր գործընկերներին հենց դա է, որ եթէ իրօք մենք խօսում ենք խաղաղ կարգաւորման մասին, միջազգային հանրութիւնը պէտք է աջակցի համապատասխան մթնոլորտի ձեւաւորմանը, հակառակ դէպքում մենք չենք կարող այս մթնոլորտում խօսել խաղաղ կարգաւորման մասին», – ասաց Փաշինեանը։

Լրագրողի հարցումին, թէ արտաքին գործոց նախարարներու առաջին հանդիպումէն ետք իրավիճակի որոշակի փոփոխութիւն կա՞յ, թէ՞՝ ոչ, վարչապետը պատասխանեց. – «Ես չեմ կարծում, թէ արտաքին գործոց նախարարներու հանդիպումը շրջադարձային է։ Հանդիպում է եղել, շփում է եղել, ըստ էութեան՝ առաջին շփումը այս թեմայի շրջանակներում, և որևէ պարագայում առաջին շփումներից մեծ արդիւնքներ ակնկալելը ճիշտ չի, դրանք արժէքաւոր են այնքանով, որ տեղի է ունենում շփում, ծանօթութիւն, եւ նոյնը կարող եմ ասել նաեւ իմ հանդիպումների մասին։ Ի հարկէ շատ լայն շրջանակ ստացուեց ծանօթութիւնների, եւ սա կարող ենք արձանագրել որպէս այցի արդիւնք։ Ընդհանուր առմամբ, նաեւ որոշակի պայմանաւորուածութիւններ ձեռք բերուեցին, հրաւէրներ եղան Երեւան գալու, պատրաստակամութիւններ արձանագրուեցին, մասնաւորապէս՝ Ֆրանկոֆոնիայի գագաթնաժողովի շրջանակներում, այնպէս որ՝ այս այցը կարելի է համարել ծանօթութիւնների հաստատման, անձնական կապերի, կոնտակտների հաստատման այց, և սրանով, ըստ էութեան, կարող ենք այցի նպատակն իրագործուած համարել»։

Մէկ այլ հարցի, թէ ի՞նչ ընկալում կար Արևմուտքի մէջ Հայաստանի Ապրիլ-Մայիս ամիսներուն տեղի ունեցածի վերաբերեալ՝ հաշուի առնելով, որ ատոր արդիւնքով Հայաստանի արտաքին քաղաքական մօտեցման որեւէ փոփոխութիւն չի եղել, արդեօ՞ք հետեւում են կաշառակերութեան դէմ գործողութիւններուն, Հայաստանի վարչապետը պատասխանեց. – «Այո, ընդհանուր առմամբ, հետեւում են, տեղեակ են բոլորը՝ ինչ է տեղի ունեցել, եւ ես բազմաթիւ շնորհաւորանքներ եմ ստացել։ Բայց ուզում եմ ընդգծել հետեւեալը, որ ես իմ բոլոր հանդիպումներում ասում եմ՝ ժողովրդավարութիւնը մեզ համար արտաքին քաղաքական կողմնորոշում չէ, այլ՝ արժէքային համակարգ, և յոյս ունեմ, որ Եւրամիութիւնում էլ, մասնաւորապէս, հենց այդպէս են ընկալում իրավիճակը։ Եւ ասում եմ, որ քանի որ ժողովրդավարութիւնը մեզ համար համոզմունք է եւ արժէքային համակարգ է, ես որեւէ կասկած չունեմ, որ մենք ժողովրդավարական բարեփոխումները մինչեւ վերջ կը տանենք և յաջողութիւն կ՚արձանագրուի: Վերադարձ նախկին ռեժիմին չի լինելու՝ ես դա բացառում եմ միանշանակ, եւ ես նաեւ ընդգծում եմ, որ մենք ի հարկէ մեր միջազգային գործընկերների աջակցութեամբ շատ աւելի արագ կարող էինք իրականացնել այդ բարեփոխումները, բայց նաեւ ընդգծում եմ, որ մենք, այսպէս ասած, հայցորդի կամ խնդրարկուի կարգավիճակում չենք, մենք մեր անելիքները գիտենք, մեր գործընկերները պէտք է ճշդեն իրենց անելիքները: Եւ ինչու եմ այսպէս ասում, որ, ըստ էութեան, մեր յեղափոխութիւնից յետոյ մենք մասնաւորապէս Եւրամիութիւնից լսել ենք բազմաթիւ յայտարարութիւններ, ողջունող յայտարարութիւններ, բայց, ըստ էութեան, քաղաքականութեան մէջ առայժմ որեւէ շօշափելի փոփոխութիւն չկայ, այսինքն՝ Եւրամիութեան քաղաքականութիւնը նոյնն է, ինչ չորս ամիս առաջ, երեք ամիս առաջ: Կարծում ենք, որ կա՛մ պէտք է այդ յայտարարութիւնների ոգեւորուած թոնայնութիւնն իջեցնել, կա՛մ քաղաքականութիւնն էականօրէն փոխել»։

Հարակից Նյութեր

Leave a Comment