Հայաստանի Ազգային Անվտանգութեան Ծառայութիւնը (ԱԱԾ) հրապարակեց Ազգային Ժողովի պատգամաւոր եւ Երկրապահ Կամաւորականներու Միութեան նախագահ Մանուէլ Գրիգորեանի էջմիածինի տան եւ այլ կալուածներու խուզարկութեան տեսարանները, ուր ի յայտ կու գան մեծ քանակութեամբ զէնք ու զինամթերք, ինչպէս նաեւ բանակի զինուորներուն համար նախատեսուած ապրանքներ:
Ըստ ԱԾԾ-ի հրապարակած հաղորդագրութեան եւ տեսաերիզին, Մանուէլ Գրիգորեանին պատկանող հանգստեան գօտին վերածուած էր զինապահեստի, արժէքաւոր նոր եւ հին մեքենաներու կայարանի եւ «զինուորի բաժին» պիտակով սնունդի, դեղորայքի, զինուորական հանդերձանքի պահեստարանի: Ըստ ԱԾԾ-ի տարածած հաղորդագրութեան Զինուորներուն հասցէագրուած արկղերուն կից նամակներէն ակնյայտ է, որ արկղներու պարունակութիւնը 2016-ին ապրիլեան քառօրեայ պատերազմի օրերուն դպրոցներու ուսանողներուն կողմէ ուղարկուած օգնութիւնն էր՝ յառաջապահ գիծի զինուորներուն:
«Պատգամաւորի հանգստեան տունը ունի նաեւ սեփական կենդանաբանական այգի, ուր կը պահուին վագր, արջեր, ջայլամներ, եւ կայ նաեւ ձիարշաւարան: Ստացուած տուեալներու հիման վրայ պարզ դարձած է, որ ապրիլեան քառօրեայ պատերազմի մասնակից զինուորներուն համար նախատեսուած սնունդը Մանուէլ Գրիգորեան օգտագործած է սեփական կենդանաբանական այգիի կենդանիներուն կերակրելու նպատակով», կը յայտնէ ԱԾԾ:
Մանուէլ Գրիգորեան ձերբակալուած էր Յունիսի 16-ին: Յունիս 17-ին դատարանը մերժեց պատգամաւորը ազատ արձակելու միջնորդութիւնը:
Միւս կողմէ, Էջմիածինի քաղաքապետ Կարէն Գրիգորեան, որ որդին է Մանուէլ Գրիգորեանի, Կիրակի ուշ երեկոյեան յայտարարեց, որ հրաժարած է իր պաշտօնէն: Կարէն Գրիգորեանի հրաժարականի պահանջով վերջին օրերուն էջմիածինի մէջ տեղի կ՛ունենային բողոքի ցոյցեր, որոնք կազմակերպուած էին Ռուսաստանէն վերջերս վերադարձած Օննիկ Ասատրեանի կողմէ, որ գողական աշխարհի մէջ ծանօթ է «Տօն Պիպօ» ծածկանունով:
Կարէն Գրիգորեանի կողմնակիցները եւս փողոց դուրս եկած էին, քաղաքը բաժնելով երկու մասի: Մտավախութիւն կար որ երկու կողմերուն միջեւ տարակարծութիւնները կրնան վերածուին զինեալ բախումներու, մանաւանդ որ անցեալին քաղաքին մէջ տեղի ունեցած էին սպանութիւններ:
Յունիս 16-ին, խուզարկուած էր նաեւ «Տօն Պիպօի» Էջմիածինի բնակարանը, ուր եւս յայտնաբերուած էր զէնք եւ զինամթերք:
Այս խուզարկութեան հիման վրայ Օննիկ Ասատրեան եւս ձերբակալուած է եւ կը մնայ կալանքի տակ: