Հայազգի աշխարհահռչակ տնտեսագէտ Տարօն Աճէմօղլուն լիայոյս է Հայաստանի ապագայով, սակայն կ’ընդունի, որ հեշտ պիտի չըլլայ:
Պոլսոյ մէջ լոյս տեսնող «Ակօս» պարբերականի հետ զրոյցին, Աճեմօղլուն անդրադարձած է Հայաստանի նորընտիր վարչապետ Նիկոլ Փաշինեանի հրաւէրին՝ նշելով, որ առաջին հնարաւորութեան պիտի այցելէ Երեւան:
Խօսելով Հայաստանի տնտեսութեան վիճակի մասին՝ տնտեսագէտը կարծիք յայտնած է, թէ երկրի տնտեսութիւնը մեծապէս տուժած է փտածութեան վրայ հիմնուած քաղաքական համակարգէն:
Ան նշած է, որ փտած համակարգը արմատախիլ ընելու բարդ գործընթացը «հնարաւոր կ’ըլլայ միայն բազմակողմանի մօտեցմամբ, ինչպէս նաեւ լաւ կրթութիւն ստացած, իտէալիստ ու նոր անձանց քաղաքականութեան դաշտ մտնելու ճանապարհով»:
Աճեմօղլուն պատմած է նաեւ, որ վարչապետ Նիկոլ Փաշինեանը զանգած ու հարցուցած է, թէ արդեօ՞ք կը փափաքի օգնել:
«Ըսի չեմ գիտեր, թէ ինչպէս եւ որքանով կրնամ օգնել որպէս երկրէն դուրս գտնուող մէկը, բայց ուրախ կ’ըլլամ, եթէ ջանքեր ներդնեմ այդ գործին մէջ», – ըսած է անուանի տնտեսագէտը:
