Վարչապետի թեկնածու Նիկոլ Փաշինեանը հանդիպում ունեցած է Հանրապետական խմբակցութեան ղեկավար Վահրամ Պաղտասարեանի հետ, որմէ ետք Փաշինեան լրագրողներուն հետ զրոյցի ընթացքին յայտնած է, որ Մայիս 8-ի նիստի հետ կապուած աշխատանքային բնոյթի հարցեր քննարկած են։
«Ազատութիւն». – Ի՞նչ քննարկեցիք, նորէն վերահաստատո՞ւմ փորձեցիք ստանալ քուէարկութեան հետ կապուած։
Նիկոլ Փաշինեան. – Վերահաստատումը կար արդէն, վերահաստատման անհրաժեշտութիւն չկայ, պարզապէս աշխատանքային բնոյթի հարցեր քննարկեցինք վաղուայ նիստի հետ կապուած։
«Ազատութիւն». – Դուք որեւէ խնդիր չէ՞ք տեսնում։
Նիկոլ Փաշինեան. – Գիտէք, ես սրանից առաջ էլ խնդիր չէի տեսնում, հիմա էլ խնդիր չեմ տեսնում, որովհետեւ ես ասել եմ, որ իրադարձութիւնների զարգացման ցանկացած սցենարի մենք պատրաստ ենք եւ պատրաստ է մեր ժողովուրդը։ Այնպէս որ ես խնդիր չեմ տեսնում։
«Ազատութիւն». – Պարոն Փաշինեան, յետոյ ի՞նչ է լինելու, 20 օրուայ ընթացքում Դուք կառավարութեան ծրագիր ներկայացնելո՞ւ էք հաստատմանը, մշակւո՞ւմ է այդ ծրագիրը։
Նիկոլ Փաշինեան. – Հիմա ես աշխատում եմ վաղուայ իմ ելոյթի վրայ։
Փաշինեան հաւաստիացրեց` նոր կառավարութեան մէջ Օլիգարխներ չեն լինելու
Փաշինեան. – Ես կարող եմ հաւաստիացնել, որ կառավարութեան մէջ օլիգարխներ չեն լինելու։
«Ազատութիւն». – Առաջարկութիւններ ստացե՞լ էք, որպէսզի նոր կառավարութիւնում ընդգրկուի այս կամ այն օլիգարխը եւ Դուք մերժել էք։
Փաշինեան. – Ո՛չ, չեմ ստացել ոչ մի առաջարկութիւն։
«Ազատութիւն». – Յորդորներ են հնչում, նոյն օլիգարխների համար, ովքեր այսօր իշխանութեան մաս են կազմում, որ այլ խաղի կանոններ են լինելու ամսի 8-ից յետոյ։ Ձեր վարչապետ ընտրուելուց յետոյ, հնարաւո՞ր է նման հանդիպում անցկացուի եւ խաղի կանոնները բացատրուեն նրանց։
Փաշինյան. – Իմ ելոյթում ես դրան կ’անդրադառնամ ի հարկէ, եւ, ի հարկէ, պէտք է խաղի կանոնները պարզ լինեն բոլորին, խաղի կանոններն օրինականութիւնն է, բայց մենք էլի ասել ենք ու էլի շատ ուզում եմ ընդգծել, որ մենք չենք պատրաստւում վենդետաների (վրէժխնդրութիւն), դա իմ ելոյթում էլ կ’ասեմ։ Հայաստանի Հանրապետութիւնում քաղաքական եւ տնտեսական հետապնդումներու էջը փակուած է, եւ մենք խնդիր ունենք համերաշխութեան մթնոլորտ ձեւաւորելու։
«Ազատութիւն». – Քննութիւններ չե՞ն լինելու, պարոն Փաշինեան, կոնկրետ դէպքերով։
Փաշինեան. – Ես արդէն ասացի, որ ոչ մի հարցով վենդետաներ չեն լինելու։
«Ազատութիւն». – Վենդետայի մասին չէ խօսքը, պարոն Փաշինեան, հանրութեան համար հնչեղութիւն ունեցող կոնկրետ դէպքերով քննութիւններ լինելո՞ւ են, որպէսզի հանրութիւնը հասկանայ, թէ որտեղ են գնացել այդ հարկերը, ովքեր չեն մուծել, ովքեր են խուսափել։
Փաշինեան. – Հանրութեանը հետաքրքրող բոլոր հարցերի պատասխանները կը ստանանք, հանրութիւնն էլ կը ստանայ ե’ւ իր հարցերի պատասխանները, ե’ւ լուծման առաջարկները, ե’ւ ուղիները, բայց ես ընդհանուր առմամբ ասում եմ, որ էն մթնոլորտը, որն այսօր կայ Հայաստանի Հանրապետութիւնում, եւ այս յեղափոխութիւնն անուանուել է սիրոյ եւ համերաշխութեան յեղափոխութիւն, էդ մթնոլորտը չպէտք է խաթարուի, բայց դա չի նշանակում, որ էն նպատակները, որ դրուած են՝ երկրում օրէնքի իշխանութիւն եւ օրէնքի առաջ բոլոր մարդկանց հաւասարութիւն ապահովելու, էդ խնդիրները չեն լուծուելու, ես ասում եմ, որ այդ բոլոր խնդիրները լուծուելու են, եւ մէկը միւսի հաշուին երբեք ու երբեք չի արուելու։ Ինչպէս կարծում եմ, որ բոլորս այս ընթացքում համոզուեցինք, այդ խնդիրները լուծելի են։
«Ազատութիւն». – 8 Մայիսից մենաշնորհներ լինելո՞ւ են։
Փաշինեան. – Ոչ, ես արդէն յայտարարել եմ, որ չեն լինելու, եւ կարծում եմ, որ բոլորս էլ արձանագրում ենք, որ այդ բոլոր յայտարարութիւններն իրականութիւն են դառնալու։
«Ազատութիւն». – Մարդիկ պրակտիկօրէն (գործնական) կարո՞ղ են փորձել ինչ ուզում են ներկրել՝ շաքարաւազի շուկայում, պանանի շուկայում։
Փաշինեան. – Քանի որ այս պահին վարչապետ չեմ, ես չեմ ուզում ոչ մի յայտարարութիւն անել, իմ վարչապետ ընտրուելու պահից՝ այո՛ եւ միանշանակ՝ այո՛, եւ ոչ միայն կարող են եւ պէտք է փորձեն, այլ մենք պէտք է հետեւենք, որպէսզի էդ յայտարարութիւնների տակ իրադարձութիւնը չշարունակի նոյնը մնալ։
Վարչապետի թեկնածուն նաեւ նշած է, որ կառավարութեան նիստերն իր վարչապետութեան օրօք պիտի իրականացուին դռնբաց։
Հայաստանի վարչապետի ընտրութեան հարցը պիտի քննարկուի 8 մայիսին, ժամը 12:00-ին իրաւունքի ուժով գումարուող Ազգային ժողովի յատուկ նիստին:
