Home ԱՐՈՒԵՍՏ - ՄՇԱԿՈՅԹ Հայ Պատգամաւոր Սելինա Տողանը Կ. Պոլսոյ մէջ «Եւա» ֆիլմը Արգիլելու Հարցը Բարձրացուցած է Խորհրդարան

Հայ Պատգամաւոր Սելինա Տողանը Կ. Պոլսոյ մէջ «Եւա» ֆիլմը Արգիլելու Հարցը Բարձրացուցած է Խորհրդարան

by MassisPost

Թուրքիոյ ընդդիմադիր «Ժողովրդահանրապետական կուսակցութենէն» (CHP-ԺՀԿ) ընտրուած հայ պատգամաւոր Սելինա Տողանը խորհրդարանի մէջ բարձրացուցած է պարսկահայ  բեմադրիչ Անահիտ Ապատի «Եւա» ֆիլմի ցուցադրութիւնը արգիլելու հարցը:

«Էրմենիհապեր»-ի փոխանցմամբ, Տողանը խորհրդարանի ղեկավարութեան ներկայացուցած է Թուրքիոյ ներքին գործերու նախարար Սուլէյման Սոյլուին ուղղուած գրաւոր հարցի մէջ՝ հետաքրքրուելով ֆիլմի ցուցադրումը արգիլելու պատճառներու մասին:

Հայ պատգամաւորը շեշտած է, որ «Եւա» ֆիլմը պէտք է ցուցադրուէր Կ. Պոլսոյ մէջ իրականացուող «Ֆիլմմոր» միջազգային շարժանկարի փառատօնի շրջանակներու մէջ, բայց ցուցադրութիւնը արգիլուած է մէկ այլ երկրի պահանջով:

Տողանը թուրք նախարարին ուղղած է հետեւեալ հարցադրումները.

«Ֆիլմը արդեօ՞ք ուսումնասիրուած է  Ձեր նախարարութեան կողմէն: Եթէ ուսումնասիրուած է, ֆիլմի ո՞ր դրուագներու մէջ առկայ են արգելքի համար հիմք հանդիսացող տարրեր: Եթէ այդպիսի հիմքեր կան, անոնք գործող օրենսդրութեան ո՞ր յօդուածները կը խախտեն»:

Տողանը աւելցուցած է նաեւ, որ շարժանկարի փառատօնի թեմային համապատասխանող եւ կնոջ ապրած անձնական ողբերգութենէն բացի այլ բան չպարունակող ֆիլմի ցուցադրութեան արգելքը կարելի է դիտել որպէս պատասխան այն հարցին, թէ ինչու Թուրքիան մինչեւ հիմա գիտութեան, արուեստի ու մարզանքի բնագաւառներու մէջ ետ մնացած է միջազգային չափանիշներէն:

Ֆիլմը կը պատմէ կնոջ մը մասին, որ կը փախչի Իրանի մէջ գտնուող իր նախկին ամուսինէն եւ ապաստան կը գտնէ Արցախի գիւղերէն մէկուն մէջ:

Ֆիլմի ցուցադրութիւնը նախատեսուած էր Մարտ 17-ին, սակայն ցուցադրութենէն ժամեր առաջ Կ. Պոլսոյ նահանգապետարանը յատուկ գրութեամբ շարժանկարի փառատօնի կազմակերպիչներուն տեղեկացուցած է ներքին գործերու նախարարութեան արգելքի մասին:

Շարժանկարի փառատօնի կազմակերպիչներէն Մելեք Օզմանը յայտարարած էր, որ ֆիլմը արգիլուած է Ատրպէյճանի ղեկավարութեան միջամտութեան հետեւանքով:

Հարակից Նյութեր

Leave a Comment