Արցախցի երիտասարդ դաշնակահարուհի Անահիտ Առուշանեանը 3 փետրուարին մասնակցած է Նիւ-Եորքի մէջ կայացած «Forte international competition» միջազգային մրցոյթ-համերգին եւ արժանացած առաջին մրցանակի, ինչպէս նաեւ յատուկ մրցանակ՝ լաւագոյն կատարողական թեխնիկայի համար եւ ոսկեայ մետալի: Այս մասին «Արցախբրես»-ին տեղեկացուցած են ԱՀ մշակոյթի, երիտասարդութեան հարցերու եւ զբօսաշրջութեան նախարարութենէն:
Անահիտ Առուշանեանը շարք մը միջազգային մրցոյթներու յաղթող է: Միայն 2017 թուականին Վրաստանի մէջ Մոցարտին նուիրուած միջազգային մրցոյթին արժանացած է առաջին մրցանակի, Քանարեան կղզիներուն մէջ հոկտեմբերին կայացած սպանական ամենամեայ միջազգային «Stars at Tenerife» (Թեներիֆէի աստղերը) մրցոյթ-փառատօնին՝ «Կրան-փրի» մրցանակի, իսկ նոյեմբերին ԱՄՆ-ի մէջ կայացած «Մանհաթըն» միջազգային երաժշտական մրցոյթին՝ առաջին մրցանակի:
