Հայաստանի մէջ Եւրոպական Միութեան պատուիրակութեան ղեկավար, դեսպան Փիթըր Սուիթալսքին եւ քաղաքացիական հասարակութեան հինգ կազմակերպութիւններու ներկայացուցիչներ Յունուար 19-ին ստորագրեցին հինգ նոր դրամաշնորհային պայմանագիրներ` ուղղուած ժողովրդավարական կառավարման եւ մարդու իրաւունքներու պաշտպանութեան ոլորտներու բարելաւման:
Փիթըր Սուիթալսքին նշեց, որ այս ծրագիրները բազմազան են եւ կ՛առնչուին իւրաքանչիւրին: «Եւրոմիութեան պատուիրակութիւնը կը մեկնարկէ հանրային կարեւորութեան հինգ նոր ծրագիր` ուղղուած քաղաքացիական հասարակութեան զարգացման: Անիկա քաղաքացիները պիտի ներգրաւէ կառավարման եւ մարդու իրաւունքներու ոլորտի տարբեր գործողութիւններու մէջ,-«Արմէնբրես»-ի փոխանցմամբ` ըսած է ան` ընդգծելով, որ լիայոյս է, որ այս նոր ծրագիրները պիտի խրախուսեն աւելի մեծ թիւով երիտասարդներու ու հասարակ քաղաքացիներու ներգրաւուելու Հայաստանի մէջ շարք մը կարեւոր հանրային քննարկումներու մէջ:
Հայաստանի քաղաքացիական հասարակութեան պիտի տրամադրուի 1.74 միլիոն եւրօ նոր ծրագիրներու համար:
«Այս ծրագիրները կ՛ընդգրկեն բազմազան ոլորտներ` փակ հաստատութիւններու մէջ մարդու իրաւունքներուն առնչուող, կանանց կողմէ ղեկավարուող կազմակերպութիւններուն ու պետական քաղաքականութեան առնչուող հարցեր, պիւտճէի կատարման, ինչպէս նաեւ ուժանիւթի ծախսերու կրճատման հարցերու»,- ըսած է Սուիթալսքի:
Ան նաեւ նշած է, որ այս ծրագիրները կը նշուին Հայաստանի եւ Եւրոմիութեան միջեւ 2017 թուականին Նոյեմբեր 24-ին ստորագրուած Համապարփակ եւ ընդլայնուած գործընկերութեան համաձայնագրին մէջ:
Այսպիսով, «Հանրային հայեացք` փակ աշխարհին, փակ հաստատութիւններու մէջ մարդու իրաւունքներու իրավիճակի մասին իրազեկման բարձրացում» երկամեայ ծրագիրը կ՛իրականացնեն «Հանրային լրագրութեան ակումբ»-ը եւ «Յանուն հաւասար իրաւունքներու» հասարակական կազմակերպութիւնը:
«ԵՄ-ն քաղաքացիական հասարակութեան. Ուժանիւթի խնայողութիւնը Հայաստանի համայնքներուն մէջ» ծրագիրը երկամեայ նախաձեռնութիւն է, որու նպատակն է ներգրաւել հասարակութեան լայն շերտերը ուժանիւթի արդիւնաւէտութեան վերաբերեալ քաղաքացիական ընկալման վերանայման գործին մէջ որպէս Հայաստանի մէջ աղքատութեան նուազեցման եւ վերացման ուղի:
«Դրական փոփոխութիւն քաղաքացիական հասարակութեան կարողութիւններու հզօրացման միջոցով» ծրագիրը երկամեայ նախաձեռնութիւն է, որ պիտի իրականացուի «Բաց հասարակութեան հիմնարկի օժանդակութեան հիմնադրամ» հայաստանեան մասնաճիւղի եւ «Հանրային քաղաքականութեան հիմնարկ»-ի եւ «Իրազեկ քաղաքացիներու միաւորում» կազմակերպութիւններուն կողմէ: