Յունաստան կատարած այցի շրջագիծէն ներս Հայաստանի արտաքին գործոց նախարար Էդուարդ Նալպանտեանի յայտարարութիւնը հայ-թրքական արձանագրութիւններուն վերաբերեալ լայն արձագանք գտած է թրքական լրատուամիջոցներուն մէջ: Բազմաթիւ թերթեր Նալպանտեանի յայտարարութիւնը հրապարակած են վերնագրերով:
Ինչպէս կը հաղորդէ «Արմենփրես»-ը, մեծ տարածում ունեցող թուրքական «Հիւրիէթ» թերթը մասնաւորապէս մէջբերած է Նալպանտեանի հետեւեալ խօսքերը. «Հայաստանի Հանրապետութեան նախագահը Սեպտեմբերին յայտարարել է, որ Երեւանն առ ոչինչ է համարելու արձանագրութիւնները: Այդ ժամանակից ի վեր դրանց վաւերացման ուղղութեամբ որեւէ դրական քայլ չի կատարուել: Այդ իսկ պատճառով 2018 թուականի գարունը դիմաւորելու ենք առանց արձանագրութիւնների»:
Նախարարի խօսքին նոյն հատուածը մէջբերած է նաեւ թրքական «Հապարթուրքը» յիշեցնելով, որ արձանագրութիւնները պէտք է վաւերացուէին երկու երկիրներու խորհրդարաններու կողմէ:
Թրքական «Միլլիեթ»-ը յիշեցուցած է, որ արձանագրութիւնները ստորագրուած էին Զուիցերիոյ միջնորդութեամբ:
Նալպանտեանի յայտարարութիւնը տեղ գտած է մի շարք այլ թրքական լրատուամիջոցներու էջերուն վրայ, ինչպէս Sputnik-ի թրքական ծառայութիւնը, «Ջումհուրիեթ»-ը, CNN Turk-ը, Gazete Duvar-ը, Bianet-ը, MyNet.com-ը, Haberler-ը, Karar-ը եւ այլն:
Յունաստանի արտաքին գործոց նախարարութենէն ներս Նալպանտեան խօսելով Հայաստանի եւ Թուրքիոյ յարաբերութիւններու մասին, յիշեցուցած է, որ Հայաստանի Նախագահ Սերժ Սարգսեանի նախաձեռնութեամբ Թուրքիոյ հետ յարաբերութիւններու կարգաւորման գործընթաց սկսած էր, որ հանգեցուց 2009-ի Հոկտեմբերին Զիւրիխի մէջ արձանագրութիւններու ստորագրման: Այնուամենայնիւ, նախարարը ընդգծած է, որ մինչ օրս այս փաստաթուղթերը չեն վաւերացուած, քանի որ Թուրքիան առաջ քաշած է անհիմն նախապայմաններ, որոնք կը հակասէին Արձանագրութիւններու տառին եւ ոգիին: