«Սեպտեմբերի 11-ն ԱՄՆ-ի եւ համաշխարհային անվտանգութեան դաշտում կտրուկ փոփոխութիւններ առաջացրեց: Այսօր հերթական Սեպտեմբերի 11-ին ենք հաւաքուել եւ խօսում Արցախի հարցի մասին, ինչը շատ նշանակալից է: Քառօրեայ պատերազմը շատ կտրուկ եւ յանկարծակի փոփոխութիւն առաջացրեց տարածաշրջանային անվտանգութեան համակարգում»,- այսօր կազմակերպուած «Անվտանգութիւնն ու դիւանագիտութիւնը Լեռնային Ղարաբաղի հակամարտութիւնում. նոր փո՞ւլ» թեմայով քննարկման ժամանակ այս մասին յայտնած է Տարածաշրջանային հետազօտութիւններու կեդրոնի տնօրէն Ռիչըրտ Կիրակոսեան:
Ան ընդգծած է, որ այս համայնապատկերին մէջ թէ՛ ուժի նուրբ հաւասարակշռութիւնը, թէ՛ միջնորդութեան եւ դիւանագիտութեան մարտահրաւէրները հաշուի առնելով, կարելի է ըսել, որ յանկարծակի պատերազմի վտանգը չափազանց բարձր կը մնայ. «Բոլոր կողմերում պետական գործիչների կամքի պակաս կայ»:
Ինչ կը վերաբերի ԵԱՀԿ Մինսկի խումբի գործունէութեան, ան նշած է, որ մտահոգիչ միտում կը տեսնէ.
«Ատրպէյճանը կարողացաւ ստիպել, որ փակուի ԵԱՀԿ վերջին գրասենեակը Հարաւային Կովկասի տարածաշրջանում: ԵԱՀԿ գրասենեակի փակումը Երեւանում հարուած էր անվտանգութեան հեռանկարին: ԵԱՀԿ Մինսկի խումբը շատ առումներով մրցավարներ չեն, նրանցից չի ակնկալուում, որ կը մեղադրեն այս կամ այն կողմին, նրանք կարող են միջնորդել եւ հաշուի առնել հակամարտութեան կողմերի ցուցաբերած կամքը: Հակամարտութեան ոչ բոլոր մասնակիցներն են սեղանի շուրջ ներկայացուած՝ որպէս բանակցող: Մինսկի խումբը բաւարար չափով թափանցիկ չէ եւ նպաստում է ապատեղեկատուութեան տարածմանը, եւ խումբ չէ, որովհետեւ չեն կիսում ռեսուրսները: Իսկ ԱՄՆ-ի անորոշութիւնը մտահոգիչ միտում է, դա ազդում է Արցախի հարցի վրայ՝ ԵԱՀԿ Մինսկի խմբի շրջանակում»:
Ըստ Կիրակոսեանի, միտում կայ խիստ կերպով նուազեցնելու ԱՄՆ-ի դերը Մինսկի խումբին մէջ, նախաձեռնութիւնը Ռուսիոյ զիջելու կամ ձգելու առումով. «ԱՄՆ-ը ռազմավարական նահանջի եզրին է: ԵԱՀԿ Մինսկի խմբին անհրաժեշտ է վերահաստատել զիջումների եւ փոխզիջումների անհրաժեշտութիւնը: Բոլոր կողմերից յիշեցնում են բաց թողնուած հնարաւորութիւնների մասին: Արցախեան հակամարտութիւնը շատ առումներով առաւել շրջահայեաց կը լինէր, եթէ արդիւնքում չլինէր յաղթող եւ պարտուող կողմ, փոխադարձ փոխզիջումներ լինէին: Հայաստանում մարդիկ ասում են, թէ փոխզիջումն անհրաժեշտ չէ: Քայլեր չեն ձեռնարկուում՝ հասարակութեանը պատրաստելու փոխզիջումների անհրաժեշտութեանը: Ռազմական գործողութիւնների վերսկսման ռիսկը նախկինից ոչ պակաս բարձր է»:
Անոր խօսքով, Արցախի մէջ կը նուազի ժողովրդավարութեան ցուցանիշը. «Վերջերս Բակօ Սահակեանի թագադրմամբ տեսնում ենք, որ այս առումով վտանգաւոր միտում կայ»:
Հարցի կարգաւորման համար, ըստ անոր, պէտք պիտի ըլլայ փոխզիջում եւ իրական դիւանագիտութիւն:
