Ընթացիկ տարուայ առաջին կիսամեակին Հայաստանի մէջ ծնած է 17,169 երեխայ: Այս ցուցանիշը նախորդ տարուայ նոյն ժամանակահատուածին համեմատ նուազած է շուրջ 7 տոկոսով: 2016 թուականի առաջին կիսամեակին ծնած էր 18,393 երեխայ: Այս մասին «Արմէնբրէս»ի մամլոյ սրահին մէջ հրաւիրուած ասուլիսի ընթացքին նշած է Հայաստանի Ազգային վիճակագրական ծառայութեան մարդահամարի եւ ժողովրդագրութեան բաժնի պետ Կարինէ Քույումճեան:
Ամենաշատ թիւով երեխաներ ծնած են Երեւան` 6 հազար 807, այնուհետեւ Կոտայք` 1,519, Արմաւիր` 1,431: Քիչ թիւով երեխաներ ծնած են Վայոց Ձորի մարզ` 275:
2017 թ. Յունուար-Յունիսին 0-1 տարեկան երեխաներու մահուան դէպքերը, 2016 թ. Յունուար-Յունիսի համեմատ, աճած են 2-ով, իսկ մանկական մահացութեան գործակիցը 1,000 կենդանի ծնածներու հաշիւով կազմած է 9.9 փրոմիլ՝ 2016թ. նոյն ժամանակաշրջանի 9.1 փրոմիլին համեմատ:
Նախորդ տարուայ 1 Յուլիսի համեմատ, ՀՀ բնակչութեան թիւը նուազած է 15,000–ով եւ այժմ կը կազմէ 2,979,900 անձ։
Բացի անկէ, 2017 թուականի ընթացքին Հայաստանէն հեռացած եւ այլեւս չէ վերադարձած 8,700 անձ։
2017թ. Յունուար-Յունիսին Հայաստանի Հանրապետութիւն ժամանած է 622,381 զբօսաշրջիկ կամ 2016թ. նոյն ժամանակաշրջանի նկատմամբ ցուցանիշն աճած է 24.2%-ով: Այս մասին կը վկայեն Ազգային վիճակագրական ծառայութեան հրապարակած տուեալները:
2017թ. Յունուար-Յունիսին զբօսաշրջութեան նպատակով Հայաստանի Հանրապետութենէն մեկնած է 570,400 անձ կամ 2016թ. համապատասխան ժամանակաշրջանի նկատմամբ ցուցանիշն աճած 21.2%-ով:
