«Գոնկրէս-ՀԺԿ» դաշինքը հանդէս եկած է յայտարարութեամբ, որու մէջ մտահոգութիւն յայտնած է քարոզարշաւի ընթացքին տեղի ունեցող բռնութեան փաստերու առնչութեամբ:
«Մամուլը բազմաթիւ տեղեկութիւններ է հաղորդում այն մասին, որ նախընտրական քարոզարշաւը ուղեկցւում է բռնարարքներով։ Մասնաւորապէս, վերջին օրերին Արմաւիրի մարզի Ջրառատ գիւղում «Օհանեան-Ռաֆֆի-Օսկանեան» դաշինքի քարոզարշաւի ժամանակ միջադէպ է տեղի ունեցել, օգտագործուել է սառը զէնք, հնչել են կրակոցներ: Արդիւնքում՝ չորս վիրաւոր տեղափոխուել է հիւանդանոց:
Ընդդիմախօսների ծեծը կազմակերպելու գործում յայտնի եւ դրանից յետոյ անպատիժ մնացած փոխոստիկանապետ Լիւա Երանոսեանի եւ իր եղբօր՝ ոստիկանութեան բարձրաստիճան սպայ Լեռնիկ Երանոսեանի հասցէին հնչող եւ տեսանիւթերով հիմնաւորուող մեղադրանքները կրկին ապացուցում են, որ անպատիժ յանցագործութիւնը ծնում է նոր յանցագործութիւններ:
Մի այլ միջադէպ է տեղի ունեցել Երեւանի Աջափնեակ համայնքում, որտեղ ՀՀԿ թեկնածու Արման Սահակեանի թիմակիցները դարանակալել եւ փորձել են հաշուեյարդար տեսնել ԲՀԿ խմբակցութեան պատգամաւոր Վահան Կարապետեանի հետ։
«Գոնկրէս-ՀԺԿ» դաշինքը անհանգստացած է քարոզարշաւի ընթացքում տեղի ունեցող այսօրինակ դէպքերով, ինչը արդիւնք է իրաւապահ մարմինների՝ իրավիճակին ոչ համարժէք արձագանգի: Կոչ ենք անում ՀՀ պատկան մարմիններին՝ հնարաւորինս կարճ ժամկէտում իրականացնել հետաքննութիւն եւ պատժել մեղաւորներին: Այսօրինակ միջադէպերի հնարաւոր արագ բացայայտումը անհրաժեշտէ՝ ապահովելու համար նախընտրական քարոզարշաւի օրինականութիւնը եւ բոլոր մասնակիցների միջեւ հաւասարութիւնը»,- նշուած է «Գոնկրէս-ՀԺԿ» դաշինքի նախըտրական շտաբի տարածած հաղորդագրութեան մէջ:
