Օհանեան-Ռաֆֆի-Օսկանեան (ՕՐՕ) դաշինքը այսօր յայտարարած է ազգային համաձայնութեան իշխանութիւն ձեւաւորելու պատրաստակամութեան մասին:
«Լի վճռականութեամբ՝ նպաստելու Հայաստանում ազգային համաձայնութեան մթնոլորտի ձեւաւորմանը, բոլոր առողջ ուժերի համախմբմանը ու միասնաբար կառուցելու ազատ, արդար, բարեկեցիկ, հզօր ու անվտանգ պետութիւն, առաջնորդուելով Հայաստանի Հանրապետութեան ժողովրդի հաւաքական կամքով՝ իրականացնել երկրում արմատական եւ համակարգային բարեփոխումներ, վճռական՝ վերականգնելու Հայաստանի Հանրապետութիւնում արդարադատութեան համակարգը, տնտեսական ազատ մրցակցութիւնը, ապահովել իւրաքանչիւր մարդու ազատութիւնների, իրաւունքների եւ արժանապատուութեան պաշտպանութիւնը եւ ազատ արձակել բոլոր քաղբանտարկեալներին, նպատակ ունենալով վերջ դնել երկրում համակարգային կոռուպցիային, իշխող կուսակցութեան՝ ՀՀԿ-ի քաղաքական մենաշնորհին, ամենաթողութեանը, տնտեսութեան անարդիւնաւէտ կառավարմանը եւ համատարած ապօրինութիւններին, եւ գիտակցելով այն պարզ իրողութիւնը, որ նախընտրական այս շրջափուլում ՀՀԿ-ի կողմից բանեցուող ընտրախախտումները եւ բռնութիւնները, Ջրառատում իրականացուած յանցագործութիւնը, իշխանութեան ապօրինի գործողութիւնների հետեւանքով Հաց բերող Արթուր Սարգսեանի վաղաժամկէտ մահը լցրել են Հայաստանի ժողովրդի համբերութեան բաժակը եւ ՀՀԿ-ի իշխանութեանը մնացել է ընդամէնը երկու շաբաթուայ կեանք»:
ՕՐՕ-ն յայտարարութեան մէջ «իր պատրաստակամութիւնն է յայտնում Հայաստանի Հանրապետութեան Ազգային ժողով ընտրուելուց յետոյ այլ ընդդիմադիր քաղաքական ուժերի հետ միասնաբար ձեւաւորել Ազգային համաձայնութեան կոալիցիոն իշխանութիւն՝ բացառելով դրանում ՀՀԿ-ի ներգրաւումը, որի կապակցութեամբ միասնաբար քննարկել եւ ստորագրել համապատասխան յուշագիր»:
