Home ՀԱՅԱՍՏԱՆԱՐՑԱԽ Նախագահ Բակօ Սահակեանի Շնորհաւորական Ուղերձը Արցախի Վերածնունդի Օրուայ Առթիւ

Նախագահ Բակօ Սահակեանի Շնորհաւորական Ուղերձը Արցախի Վերածնունդի Օրուայ Առթիւ

by MassisPost

Արցախի հանրապետութեան նախագահ Բակօ Սահակեան շնորհաւորական ուղերձ յղած է Արցախի վերածնունդի օրուայ առթիւ:

Ուղերձը կը ներկայացնենք ստորեւ.-

Սիրելի՛ հայրենակիցներ,

Արցախի Հանրապետութեան իշխանութիւնների եւ անձամբ իմ անունից ի սրտէ շնորհաւորում եմ Արցախի վերածննդի օրուայ առթիւ:

1988 թուականի փետրուարի 20-ը մեր ժողովրդի տարեգրութեան մէջ մտաւ որպէս ճակատագրական եւ վճռորոշ օր, որն ազդարարեց արցախահայութեան` ազատ  ու անկախ ապրելու անսասան կամքի մասին: Այն դարձաւ համազգային միասնութեան եւ անպարտելի ոգու զարթօնքի խորհրդանիշ: Սկիզբ առաւ օտարի լծի դէմ ըմբոստացման համաժողովրդական ալիք, որը վերածուեց ազգային-ազատագրական շարժման եւ մեր ազգային պետականութեան վերակերտման` ժողովրդավարութեան  արժէքներին եւ միջազգային իրաւունքի նորմերին ու սկզբունքներին համապատասխան:

Յանուն մեր արդար պայքարի յաղթանակի` սեփական կեանքը զոհեցին քաջ հայորդիներ, ովքեր իրենց անօրինակ խիզախութեամբ ու սխրանքով գրեցին հայ ժողովրդի նորագոյն պատմութեան հերոսական էջերը: Յաւե~րժ փառք ու պատիւ հայրենիքի նուիրեալներին:

Այս բոլոր տարիների ընթացքում Մայր Հայաստանի եւ Սփիւռքի մեր քոյրերի ու եղբայրների հետ միասին մենք կառուցում ու շենացնում ենք բոլորիս համար թանկ ու սիրելի Արցախը, պաշտպանում  ենք մեր պապենական հողն ու օճախը, մեր երեխաների ապագան: Մենք ուրիշների իրաւունքներին չենք բռնանում, բայց եւ մեր իրաւունքները միշտ կը պաշտպանենք:

Թանկագի՛ն արցախցիներ,

Մէկ անգամ եւս շնորհաւորում եմ բոլորիս պետական կարեւորագոյն տօնի կապակցութեամբ եւ մաղթում խաղաղութիւն ու մեծագոյն յաջողութիւններ ազատ ու անկախ Արցախի Հանրապետութեանը եւ մեր ողջ ժողովրդին:

Հարակից Նյութեր

Leave a Comment