Home ՀԱՅԱՍՏԱՆ Հայաստան Կրթական Ոլորտի Ցուցանիշը Նահանջ Արձանագրած Է

Հայաստան Կրթական Ոլորտի Ցուցանիշը Նահանջ Արձանագրած Է

by MassisPost

Վերջերս, Տաւոսի յայտնի տնտեսական ֆորում ներկայացուած Տաղանդներու մրցունակութեան համաշխարհային սանդղակը, որ տարբեր ցուցանիշներով դասակարգած է նաեւ երկիրներու կրթական համակարգերը, մտահոգած է հայ մասնագէտները:

Ոլորտի փորձագէտ Սերոբ Խաչատրեան ահազանգող համարած է յատկապէս կրթական ցուցանիշի նահանջը: Այս ցուցանիշով Հայաստան 118 երկիրներու մէջ 114-րդն է՝ անցնելով միայն ափրիկեան չորս երկիրներ: Ըստ Խաչատրեանի․ «Հիմնական անկումը այստեղ վերաբերում է ֆինանսական վիճակին: Այսինքն, ֆինանսական վիճակը մեր համալսարանների շատ վատ է: Աշխարհում չկայ այդպիսի դէպք, որ որեւէ երկիր, որը տնտեսական լաւ ցուցանիշ չունենայ, ունենայ լաւ համալսարաններ»:

Ուսման վարձավճարներէն բուհական (համալսարանական) համակարգի կախումը թուլացուցած է Հայաստանի դիրքերը աշխարհի կրթական քարտէզին վրայ: Իսկ 2015-ին Պիզայի աշակերտական միջազգային ստուգատեսին չմասնակցիլը դատարկ թողնած է զեկոյցին մէջ՝ հայ դպրոցականներու գիտելիքներու որակի մասին վկայող վանդակը: Սերոբ Խաչատրեան նկատած է․ «Տասը-քսան տարի առաջ դա համարուում էր կարեւորագոյն ցուցանիշներից մէկը: Բայց միշտ մենք դա ասում ենք, որ չի կարելի Հայաստանի կրթական համակարգի մասին խօսելիս օլիմպիական մետալներն ու նուաճումները ներկայացնել որպէս կրթութեան որակի ցուցանիշ: Որովհետեւ միջազգային կազմակերպութիւնները օլիմպիական մետալները չեն ճանաչում որպէս կրթութեան որակի ցուցանիշ»:

Կրթութեան եւ գիտութեան նախարար Լեւոն Մկրտչեան չի գիտէր, թէ ինչու 2015-ին հայաստանցի աշակերտները չեն մասնակցած Պիզայի ստուգատեսին, քանի որ ինք այդ ժամանակ նախարար չէր:
Փորձագէտ Սամուէլ Կարաբերկեանի համոզմամբ՝ այս պէտք է դառնայ հերթական ազդակ, որ կը ստիպէ ոլորտի պատասխանատուներուն մտածել լճացումէն դուրս գալու մասին:

Կարաբերկեանի կարծիքով, զեկոյցին մէջ արտացոլած թիւերը կը վկայեն, որ Հայաստանի մէջ կ’աշխատին ոչ թէ որակի, այլ քանակի վրայ: Օրինակ, տպագրուած գիտական յօդուածներու թիւով 44-րդն ենք, բայց գիտական հիմնարկներու որակով՝ 96-րդը:

Փորձագէտները ըսած են, որ կառավարութիւնը այսօր կրթութեան շատ աւելի քիչ գումար կը յատկացնէ, քան 10 տարի առաջ: Այս տարուան պիւճէով ոլորտին յատկացուած է 127 միլիառ 594 միլիոն դրամ, որ միջին փոխարժէքով հաւասար է 265 միլիոն 671 հազար տոլարի: Մինչդեռ 2008-ին պետպիւճէէն կրթութիւնը ստացած է 103 միլիառ 681 միլիոն դրամ, որ այդ ժամանակուան միջին փոխարժէքով կը կազմէր 338 միլիոն 860 հազար տոլար՝ մօտ 73 հազար տոլարով աւելի է, քանի հիմա:

Հարակից Նյութեր

Leave a Comment