Home ԱՐՈՒԵՍՏ - ՄՇԱԿՈՅԹ ՀԲԸՄ «Գրիգոր Սաթամեան» Թատերախումբը Հանդէս Պիտի Գայ «Թենոր Մը Կ՛ուզուի» Կատակերգութեամբ

ՀԲԸՄ «Գրիգոր Սաթամեան» Թատերախումբը Հանդէս Պիտի Գայ «Թենոր Մը Կ՛ուզուի» Կատակերգութեամբ

by MassisPost

ՀԲԸ Միութեան Գրիգոր Սաթամեան թատերախումբի «Դրամը ինչե՞ր Կ՛ընէ» կատակերգութեան աննախընթաց յաջողութենէն ետք, թատերախումբը հանդէս պիտի գայ ուրիշ ծիծաղաշարժ կատակերգութեամբ մը՝ «Թենոր Մը կ՛ուզուի» պիտակին տակ, որ պիտի ներկայացուի յառաջիկայ Հոկտեմբեր 22-էն սկսեալ։

Հոս տեղին է յիշել որ «Դրամը Ինչե՞ր Կ՛ընէ» կատակերգութիւնը աւելի քան 10 անգամ ներկայացուեցաւ Փասատինայի եւ Սան Ֆէրնանտօ Հովիտին մէջ, առաւել թատերախումբը հիւրախաղերով հանդէս եկաւ Օրէնճ Քաունթի, Ֆրզնոյի եւ հեռաւոր Նիւ Ճըրզիի մէջ, խանդավառելով բոլոր հանդիսատեսները անխտիր։

«Թենոր Մը Կ՛ուզուի» կատակերգութեան հեղինակն է  ամերիկացի թատերագիր Քէն Լուտուիկ, իսկ թարգմանիչը՝ բեմադրիչ Գրիգոր Սաթամեան։Այս թատերախաղը բեմադրուած է աւելի քան 30 երկիրներու մէջ, 20 տարբեր լեզուներով։

Երկու արարներով այս թատերախաղին գործողութիւնը տեղի կ՛ունենայ 1934 թուականին, Օհայօ նահանգի Քլիվլընտ քաղաքին մէջ։ Քլիվլընտի օփերան պիտի ներկայացնէ Օթելլոն, որուն գլխաւոր դերը՝ մէկ գիշեր  խաղալու համար  հրաւիրուած է Իտալացի աշխարհահռչակ թենոր Թիթօ Միրելլին։

Մեծ ակնկալութիւններով Թիթօ Միրելլի կը հասնի Քլիվլընտ, սակայն իրարայաջորդ ակամայ եւ խիստ ծիծաղաշարժ սխալմունքներով, ան բեմ չի կրնար բարձրանար՝ բայց ներկայացումը տեղի կ՛ունենայ, մեծ յաջողութիւն ձեռք ձգելով։ Ինչպէ՞ս, պէտք է անձամբ ներկայ ըլլաք գիտնալու համար թէ ինչպէս այդ թնճուկը՝ հանգոյցի մը նման կը քակուի, քրքջալից տեսարաններու ընդմէջէն . . .

Այս թատերախաղը պիտի ներկայացուի ՀԲԸ Միութեան Փասատինայի կեդրոնի սրահին մէջ, հետեւեալ թուականներուն։ Հոկտեմբեր 22, 23, 30 եւ Նոյեմբեր 5 եւ 6.

Շաբաթ օրուան ելոյթները երեկոյեան ժամը 8-ին, իսկ Կիրակի օրերը՝ ժամը 6-ին:

Տոմսերու գիներն են $25, իսկ ստանալու համար եւ կամ այլ տեղեկութեանց համար կարելի է հեռաձայնել  ՀԲԸ Միութեան Փասատինայի գրասենեակը, հետեւեալ թիւով։ (626) 794-7942

Հարակից Նյութեր

Leave a Comment