Home ՀԱՅԱՍՏԱՆԱՐՑԱԽ Դաւիթ Բաբայեան․ Հնարաւոր Փոխզիջումը Որեւէ Կերպ Պէտք Չէ Թուլացնէ Արցախի Անվտանգութեան Համակարգը

Դաւիթ Բաբայեան․ Հնարաւոր Փոխզիջումը Որեւէ Կերպ Պէտք Չէ Թուլացնէ Արցախի Անվտանգութեան Համակարգը

by MassisPost

«Դա նշանակում է, որ մենք երբեւիցէ չենք գնայ որեւէ քայլի, որը փոքր-ինչ կը խարխլի մեր անվտանգութիւնը եւ թոյլ չի տայ Արցախին ապահովել իր անվտանգութիւնը սեփական ուժերով: Սա ամենակարեւորն է՝ սեփական ուժերով: Այսինքն մենք երեւիցէ չպէտք է կախւած լինենք ինչ-որ մի պետութիւնից, ինչ-որ մի ուժից, որը պէտք է մեր անվտանգութիւնն ապահովի», – «Ազատութեան» հետ ունեցած զրոյցի ընթացքին յայտնեց Ղարաբաղի նախագահի աշխատակազմի ղեկավարի տեղակալ Դաւիթ Բաբայեան՝ մեկնաբանելով անցեալ շաբաթավերջը Լեռնային Ղարաբաղի նախագահ Բակօ Սահակեանին ֆրանսիական մամուլին տուած հարցազրոյցը:

Լեռնային Ղարաբաղի նախագահը, յիշեցնենք, հարցազրոյցի ընթացքին նշած էր, որ Լեռնային Ղարաբաղի պէս բարդ հակամարտութիւններու լուծումը չի կրնար իրականացուիլ միայն փոխզիջումներու միջոցով:

«Փոխզիջման հետ կապած անընդհատ ինչ-որ մարդիկ շահարկում են տարածքների խնդիր՝ ցույց տալով, որ իրենք կան, ինչ-որ նեղ քաղաքական, կեղտոտ նպատակներ հետապնդելու համար տարածում են, թէ իբրեւ տարածքներ են յանձնւում, էս մէկը, էն մէկը․․․ Երկու խնդիր կայ այստեղ․ առաջինը, մենք չենք կարող խուսափել այդ հարցի քննարկումից, որովհետեւ Ազրպէյճանը անընդհատ այդ հարցը բարձրացնում է: Եւ միջնորդ երկրները, իրենք դատաւորներ չեն, իրենք պարզապէս միջնորդներ են եւ ստիպւած Ազրպէյճանի այդ անհեթէթութիւնները պարտաւոր են ներառել էս գործընթացի մէջ: Հետոյ, երբ որ խօսում են տարածքների մասին, չգիտես ինչի, մոռացութեան են մատնում, նաեւ հայկական հասարակութեան մէջ, որ տարածքները միակողմանի չեն, տարածքային խնդիր ունի նաեւ Արցախը՝ Գետաշէնի խնդիր կայ, Հիւսիսային Արցախի խնդիր կայ, Չարդախլուի խնդիր կայ․․․»

Հարցումին, թէ արդեօք հայկական կողմը բանակցութիւններու ընթացքին կը բարձրացնէ Գետաշէնի եւ Շահումեանի հարցերը, Բաբայեան պատասխանեց․ – «Մենք միշտ բարձրացնում ենք եւ բարձրացնելու ենք այդ հարցը: Եւ չեմ կասկածում, որ նոյնը անում է նաեւ պաշտօնական Երեւանը»:

Իսկ հարցումին, թէ ինչի՞ն կը վերաբերի հնարաւոր փոխզիջումը, եթէ ոչ տարածքներին, ան արձագանքեց․ – «Օրինակ, Ազրպէյճանը ճանաչում է [ԼՂ] Հանրապետութեանը, մենք էլ ճանաչում ենք Ազրպէյճանին․․․ Փոխզիջո՞ւմ է դա: Ի հարկէ փոխզիջում է: Համարժէք պէտք է լինի: Երբեմն այսպիսի կարծիքներ են հնչում, որ տարածք տւէք, իրենք նաւթամուղը բացում են, կամ գազատարը: Սա ո՞նց կարելի է համարել ընդունելի կամ համարժէք․ վաղը իրենք գազատարը փակում են, մենք տարածքը ո՞նց ենք հետ բերելու»:

Ան պնդեց, որ Լեռնային Ղարաբաղը պէտք է ներգրաւուի գործընթացի ժամանակ որպէս բանակցային լիիրա կողմ․ – «Մինչեւ չվերականգնուի բանակցային լիարժէք ձեւաչափը, մենք չնստենք Պաքուի հետ որպէս հաւասար կողմեր բանակցային սեղանի շուրջ, որեւէ բանի մասին խօսելը անիմաստ է»:

Լեռնային Ղարաբաղի Ազգային ժողովի ընդդիմադիր պատգամաւոր Հայկ Խանումեան կը կարծէ, որ Արցախի միջազգային ճանաչման ուղղուած ջանքերը կրնան նպաստել, որ Ստեփանակերտը վերադառնայ բանակցային սեղան․ – «Այսինքն, եթէ ակտիւ աշխատանք է կատարւում Արցախի միջազգային ճանաչման ուղղութեամբ, եւ մենք ունենում ենք արդիւնքներ, աւտթոմաթ բանակցողը դառնում է Արցախը, ոչ թէ Երեւանը»:

Ան վստահ է, որ տարածքներու հարցը Ղարաբաղի մէջ չի քննարկուիր․ – «Նոյնպէս վստահ եմ, որ փոխզիջումներ ասելով [Բակօ Սահակեանը] տարածքային զիջումներ նկատի չի ունեցել, քանզի արցախեան բոլոր քաղաքական ուժերը եւ ժողովրդի գերակշռող մեծամասնութիւնը դէմ է տարածքային զիջումներին: Այս պահին ընդհանրապէս փոխզիջումներից խօսալը ես համարում եմ սխալ եւ համարում եմ, իշխանութիւնների սիրած թերմինով ասած՝ թշնամու ջրաղացին ջուր լեցնել: Ինչ վերաբերում է նրան, որ նշում են, թէ փոխզիջումների այլընտրանքը պատերազմն է, ես համաձայն եմ: Փոխզիջումների այլընտրանքը պատերազմն է, բայց փոխզիջումների առկայութեան դէպքում մենք կ՛ունենք պատերազմ՝ աւելի աննպաստ պայմաններով»:

Խանումեան չի կարծեր, որ բանակցութիւններու ընթացքին հայկական կողմը կը բարձրացնայ, օրինակ, այժմ Ազրպէյճանի վերահսկողութեան տակ գտնուող Գետաշէնի կամ Շահումեանի հարցը․ – «Ես խիստ կասկածում եմ, որ պաշտօնական Ստեփանակերտը էդ հարցերը բարձրացնում է, կամ ընդհանրապէս հայկական կողմը: Ես համանախագահների հետ հանդիպել եմ մի երկու տարի առաջ քաղաքացիական հասարակութեան հետ հանդիպման շրջանակներում, եւ այնպիսի տպաւորութիւն էր, որ Ստեփանակերտը կամ Երեւանը փորձում են իրենց պատկերացմամբ դիւանագիտական ձեւակերպումներով խուսափել մեր իրական կարծիքը ներկայացնելուց: Նոյն այդ հարցազրույցը նոյնպէս նախագահի, կարող եմ ասել, որ հաւանաբար փորձել է արտաքին աշխարհի առջեւ կառուցողական լինել՝ խուսափելով ներկայացնել մեր իրական տեսակէտը: Այնինչ ժամանակն է յստակ խօսել եւ յստակ ներկայացնել քո տեսակէտը: Պէտք է ասել, որ տարածքային զիջումները բացառւում են, արցախեան խնդիրը տարածքների խնդիր չէ, սա ազգերի ինքնորոշման խնդիր է, եւ առաջնայինը պէտք է միջազգայնօրէն ճանաչւի Լեռնային Ղարաբաղի Հանրապետութիւնը՝ որպէս ազգերի ինքնորոշման իրաւունքի իրականացւած աքթ»:

Հարակից Նյութեր

Leave a Comment