Ապրիլ 18-ին հեռախօսազրոյց ունեցած են Ռուսաստանի Դաշնութեան արտաքին գործերու փոխնախարար Միխայիլ Կալուզինը եւ Թուրքիոյ հետ յարաբերութիւններու կարգաւորման հարցերով Հայաստանի յատուկ ներկայացուցիչ, ՀՀ Ազգային Ժողովի փոխխօսնակ Ռուբէն Ռուբինեանը։
Ռուսական կողմը հաստատած է իր պատրաստակամութիւնը՝ շարունակելու նպաստել Երեւանի եւ Անքարայի միջեւ յարաբերութիւններու կարգաւորման գործընթացին, քանի որ հայ-թրքական յարաբերութիւններու բարելաւումը կարեւոր գործօն է Հարաւային Կովկասի կայունութեան եւ զարգացման համար։
Ռուբինեան տեղեկացուցած է Հայաստանի եւ Թուրքիոյ միջեւ յարաբերութիւններու կարգաւորման ոլորտի վերջին զարգացումներուն մասին։
Քննարկուած են նաեւ հայ-ռուսական յարաբերութիւններուն վերաբերող շարք մը հարցեր, ինչպէս նաեւ Հարաւային Կովկասի տարածաշրջանին մէջ փոխգործակցութիւնը, այդ շարքին՝ «3+3» տարածաշրջանային համագործակցութեան հարթակի (Ատրպէյճան, Հայաստան, Վրաստան, գումարած Ռուսաստան, Իրան, Թուրքիայ) շրջանակին մէջ։
Կարծիքներու փոխանակումը տեղի ունեցած է կառուցողական մթնոլորտի մէջ։
