«Կ’ողջունեմ խաղաղութեան հաստատման ուղղութեամբ Ատրպէյճանի եւ Հայաստանի ձեռնարկած քայլերը»,- նշած է Միացեալ Նահանգներու նախագահ Տոնալտ Թրամփ Նովրուզի առթիւ Ատրպէյճանի նախագահին ուղղուած շնորհաւորական ուղերձին մէջ։ Անոր բնագիրը հրապարակուած է Ատրպէյճանի պետական Azertag գործակալութեան կայքին մէջ։
«Միացեալ Նահանգներն ու Ատրպէյճանը համատեղ աշխատանքի երկարատեւ պատմութիւն ունին։ Յոյսով եմ, որ յառաջիկայ տարիներուն մենք քայլեր պիտի ձեռնարկենք նոր մեծ գործերուն ընդառաջ,- նշած է Թրամփ՝ յաւելելով,- Ես երախտապարտ եմ Ատրպէյճանին մեր գործընկեր Իսրայէլի հետ բարեկամութեան, այդ երկրին ցուցաբերած աջակցութեան համար»։
«Միացեալ Նահանգները հետագային եւս պիտի աջակցի Ատրպէյճանի ինքնիշխանութեան, անկախութեան ու տարածքային ամբողջականութեան»,- եզրափակած է Թրամփ։
Օրեր առաջ ԱՄՆ Պետական քարտուղարութեան ուժանիւթային միջոցներու պետական բիւրոյի աւագ խորհրդական Էրիք Ճէյքոպզ յայտնած էր՝ ԱՄՆ նախագահը անհամբեր կը սպասէ Ատրպէյճանի եւ Հայաստանի միջեւ երկար սպասուած խաղաղութեան պայմանագրի ստորագրման:
