Զուիցերիոյ Դաշնային ժողովի Վերին պալատը՝ Քանթոններու խորհուրդը, Մարտ 18-ին ընդունած է №24.4259 նախագիծը՝ «Լեռնային Ղարաբաղի համար Խաղաղութեան համագումար. հայերու վերադարձի հնարաւորութեան ապահովում» վերնագրով։
46 անդամներէն 29-ն կողմ քուէարկած են նախաձեռնութեան, որով կոչ կը կատարուի Զուիցերիոյ իշխանութիւններուն հիմնելու առանձնացուած հարթակ՝ Լեռնային Ղարաբաղի եւ Ատրպէյճանի ներկայացուցիչներուն միջեւ երկխօսութեան համար։
Նախաձեռնութեան նպատակն է «դիւրացնել Ատրպէյճանի եւ Լեռնային Ղարաբաղի հայերու ներկայացուցիչներուն միջեւ երկխօսութիւնը հայ բնակչութեան անվտանգ եւ հաւաքական վերադարձի շուրջ՝ միջազգային դերակատարներու հսկողութեամբ կամ ներկայութեամբ»։
