Թուրքիոյ Շանլըուրֆա նահանգի (պատմ.՝ Ուրֆա) Հալֆեթի շրջանին մէջ վաճառքի հանուած է հայկական եկեղեցւոյ հողատարածքը։ Նման յայտարարութիւն տեղադրուած է 2025-ի Փետրուար 5-ին անշարժ գոյքի գործակալութեան կայքին մէջ եւ նշուած, որ «հայկական եկեղեցւոյ եւ քահանայի տան» զբաղեցուցած հողատարածքը կը վաճառուի 2 միլիոն 810 հազար լիրայով (մօտ 77 հազար 500 տոլար):
Կայքը նշած է, որ եկեղեցւոյ տարածքը կը կազմէ 904 քմ, եւ առկայ է շինութեան սեփականութեան վկայականը։
Հայկական եկեղեցւոյ հարեւանութեամբ բնակող Թուրքիոյ քաղաքացիներէն մէկը նշած է, որ այդտեղ նախապէս հայեր ապրած են, ու գիւղին մէջ կար հայկական եկեղեցի եւ քահանայի տուն։ Ըստ անոր՝ հայերը մօտ 120 տարի առաջ գիւղէն հեռացած են, եւ անկէ յետոյ եկեղեցւոյ մէկ մասը մզկիթի վերածուած է։
«Եկեղեցւոյ պատերուն, ինչպէս նաեւ տան պատերուն կային նախշեր։ Այդ նախշազարդ պատերը 2023-ի փետրուարեան երկրաշարժին հետեւանքով փլուզուած են։ Երկրաշարժէն առաջ այստեղ բնակած է սեփականատէրը, բայց վերջերս ալ լսած ենք, որ ան կ’ուզէ վաճառել»,- պատմած է ան։
