«Նախիջեւանի եւ Ատրպէյճանի արեւելեան շրջաններու միջանցքը այսպէս թէ այնպէս պիտի օգտագործուի, այդ նպատակով կրնայ երթուղի ընտրուիլ Հայաստանով կամ Իրանով: Այս ամէնը ընթացող բանակցութիւններու առարկայ է»:
Թրքական «CNN Turk» հեռուստաալիքի եթերով ըսած է Թուրքիոյ փոխադրութեան եւ ենթակառուցուածքներու նախարար Ապտուլքատիր Ուրալօղլուն՝ մեկնաբանելով, այսպէս կոչուած, «Զանգեզուրի միջանցք»-ի բացման թեման։
Անոր խօսքով, Հարաւային Կովկասի մէջ հաղորդակցութիւններու բացման հարցի շուրջ Պաքուի եւ Երեւանի միջեւ երկխօսութեան հետ մէկտեղ օրակարգի վրայ է Իրանի տարածքով այլընտրանքային ճանապարհը։
«Այս հարցը կը գտնուի մեր ատրպէյճանցի եղբայրներու վերահսկողութեան տակ։ Անքարան նոյնպէս կը հետեւի այս գործընթացին»,- ըսած է Թուրքիոյ Փոխադրութեան նախարարութեան ղեկավարը։
Ուրալօղլուն նշած է, որ Թուրքիա շահագրգռուած է Ատրպէյճանի եւ Հայաստանի միջեւ բանակցութիւններու շուտափոյթ աւարտով եւ խաղաղութեան պայմանագրի ստորագրմամբ։
«Ի հարկէ, օրակարգը յառաջ տանելով կարեւոր է հաշուի առնել պետութիւններու ազգային անվտանգութեան խնդիրները։ Մեզի համար կարեւոր է, որ Պաքուի եւ Երեւանի միջեւ լարուածութիւնը թուլնայ»,- ըսած է թուրք նախարարը։
Ուրալօղլուն այնուհետեւ ընդգծած է, որ Եւրոպայի եւ Ասիոյ միջեւ ապրանքներու մատակարարման այս ուղին առկայ այլընտրանքներէն ամենաեկամտաբերն է, ամենաանվտանգը եւ ամենակարճը, զայն կոչել «միջին միջանցք»:
«Միջին միջանցքի երկայնքով առաքման ժամկէտը կը գնահատուի 18 օր: Յայտարարուած է նաեւ վերջնաժամկէտ՝ 14 օր։ Կ’ուզեմ նշել, որ Թուրքիոյ դիրքը Եւրասիոյ մէջ առեւտրային մատակարարման ուղիներու համար առաւել շահաւէտն է»,- յաւելած է երկրի Փոխադրութեան նախարարութեան ղեկավարը։
