Ռուսաստանը, չնայած Եւրոմիութեան արգելքին, որ սահմանուած է 2014 թուականէն, հարեւան երկիրներու միջոցով կը ստանայ արեւմտեան ընկերութիւններու արտադրութեան հազարաւոր դիպուկահար հրացաններ եւ միլիոնաւոր պարկուճներ, կը յայտնէ «The Insider»-ը՝ չեխական Investigace.cz-ի, իտալական IrpiMedia-ի եւ ղազախական Vlast.kz-ի հետ համատեղ հետաքննութեան բերումով:
Լրագրողները պարզած են, որ վերջին տարիներուն Եւրոմիութեան, ԱՄՆ-ի եւ Թուրքիոյ ընկերութիւնները մեծցուցած են զէնքի մատակարարումները Հայաստան, Վրաստան, Ղազախիստան, Ղրղըզիստան եւ Ուզպեքիստան։
«Հայաստան, Վրաստան, Ղազախիստան եւ Ղրղըզիստան արտահանումը երեք տարուայ ընթացքին աճած է երկուքուկէս անգամ՝ 2020 թուականի՝ մօտ 20 հազար հրացանափողէն հասնելով 53 հազարի՝ 2023 թուականին»,- կ’ըսուի հրապարակման մէջ։
Հետաքննութիւնը կը նշէ նաեւ, որ Իտալիայէն Հայաստան դիպուկահար հրացաններու եւ այլ զէնքի արտահանումը չորս տարուայ ընթացքին աճածէ գրեթէ 30 անգամ՝ 2019-ին 68 միաւոր զէնքէն հասնելով 1862-ի՝ 2023-ին։
Հայաստանի Պաշտպանութեան նախարարութիւնը չի մեկնաբաներ ռազմական գնումները։
Ըստ «The Insider»-ի՝ Ղրղըզիստանը 2020 եւ 2021 թուականներուն Իտալիայէն զէնք ընդհանրապէս չէ գնած, 2022 թուականին ստացած է 882 միաւոր զէնք, իսկ 2023 թուականին՝ 4 հազար 434:
Թուրքիայէն Վրաստան զէնքի արտահանումը 2019 թուականին աւելի քան 8 հազար միաւորէն 2023 թուականին հասած է գրեթէ 19 հազարի։ Բացի անկէ, «The Insider»-ը կը նշէ, որ ռուս դիպուկահարները կը շարունակեն ռուսական զէնքի փոխարէն օգտագործել արեւմտեան հրացաններ ու պարկուճներ։ Այդ կը հաստատեն նաեւ դիպուկահարներու մրցումներու տեսագրութիւնները։
