ՀՀ բարձր արհեստագիտական արդիւնաբերութեան նախարար Մխիթար Հայրապետեան մասնակցած է «Մտքի ուժը. արհեստական բանականութիւնը սահմաններէն այն կողմ՝ բարոյագիտութեան շրջանակներուն մէջ» խորագրով WCIT2024/DigiTec համաշխարհային համագումարի մամուլի ասուլիսին:
Նախարարը նշած է, որ վերջին հինգ տարուայ ընթացքին Հայաստանը երկրորդ անգամ կը հիւրընկալէ նորարարութիւններու եւ արհեստագիտութիւններու համաշխարհային համագումարը, ինչ որ կու գայ եւս մէկ անգամ ընդգծելու ՀՀ-ի յաւակնութիւնները՝ դառնալու տարածաշրջանային արհեստագիտական կարեւորագոյն կեդրոն: Նախարարը շեշտած է, որ միահամուռ ջանքերու շնորհիւ Հայաստանը դարձած է կարեւորագոյն կիզակէտ արհեստագիտական քարտէզի վրայ եւ համոզմունք յայտնած, որ այս 3 օրերու ընթացքին հնարաւորութիւն պիտի ստեղծուի բացայայտելու արհեստական բանականութեան կողմէ մարդկութեան եւ առհասարակ արհեստագիտական աշխարհին առաջարկուող նոր հնարաւորութիւններն ու գործիքակազմերը, որոնք կու գան փոխելու առհասարակ բոլորս, մեր կեանքն ու մոլորակը:
Հայրապետեան ընդգծած է, որ WCIT-ն չափազանց կարեւոր միջազգային հարթակ պիտի ըլլայ նորանոր բացայայտումներու համար եւ բարի երթ մաղթած է համագումարի աշխատանքներուն:
Նորարարութիւններու, արհեստագիտութիւններու եւ ծառայութիւններու համաշխարհային դաշինքի (WITSA) ղեկավար Շան Սիան իր հերթին նշած է, որ 2019 թուականի համագումարի օրերուն կրկին հաւաքուած էին Երեւանի մէջ, հետեւաբար ունին բազմաթիւ հաճելի յիշողութիւններ: Ան տեղեկացուցած է, որ WITSA-ը 28-րդ անգամ կը կազմակերպէ այս համագումարը:
