ՀՀ Արտաքին գործերու նախարարութեան դիմաց բողոքի շարժումի ընթացքին առերեւոյթ խուլիկանութիւն կատարելու համար քրէական հետապնդում յարուցուած է 5 անձի նկատմամբ, յայտնած են ՀՀ Քննչական Կոմիտէէն։
«ՀՀ Քննչական Կոմիտէի ՀԿԳ քննութեան գլխաւոր վարչութիւնում քննուող քրէական վարոյթի շրջանակներում իրականացուած քննչական եւ վարութային ծաւալուն գործողութիւնների արդիւնքում պարզուել են ՀՀ Արտաքին գործերի նախարարութեան շէնքի դիմաց կազմակերպուած շարժման ընթացքում մի խումբ անձանց կողմից կատարուած խուլիկանութեան դէպքի մի շարք հանգամանքներ։
Մասնավորապէս, «Տաւուշը յանուն հայրենիքի» շարժման շրջանակներում 2024 թուականի Մայիսի 31-ին՝ ժամը 16։00-ի սահմաններում, Երեւանի Վազգէն Սարգսեան փողոց 3 Կառավարական տուն 2 հասցէում գտնուող ՀՀ Արտաքին գործերի նախարարութեան շէնքի դիմաց կազմակերպուած շարժման ընթացքում, մի խումբ անձինք, սեփական անձի կարծեցեալ առաւելութիւններն ընդգծելու եւ խուլիկանութիւն կատարելու ուղղակի դիտաւորութեամբ, հասարակութեան նկատմամբ անյարգալից, իրաւական եւ բարոյական կանոնների նկատմամբ բացայայտ արհամարհական վերաբերմունք ցուցաբերելով, անտեսելով ոստիկանութեան ծառայողների կողմից պատշաճ վարքագիծ դրսեւորելու եւ հասարակական կարգը չխախտելու պահանջները, անպարկեշտ արտայայտութիւններ եւ հայհոյանքներ են հնչեցրել, շիշ եւ տարբեր առարկաներ նետել տեղում ծառայութիւն իրականացնող՝ ՀՀ ՆԳՆ ոստիկանութեան ծառայողների եւ Արտաքին գործերի նախարարութեան շէնքի ուղղութեամբ:
Այդ ընթացքում խուլիկանութեան մասնակիցներից մի քանիսը, փոխլրացնելով միմեանց գործողութիւնները, իրենց մօտ գտնուող ծխարձակող առարկաները նետել են ոստիկանութեան ծառայողների ուղղութեամբ, նրանցից մէկը ոտքով հարուածներ է հասցրել ոստիկանութեան աշխատակիցների շարքի ուղղութեամբ, որոնք դիպել են ոստիկանութեան ծառայողներից մէկի ձեռքում գտնուող ոստիկանական վահանին։ Արդիւնքում, խախտուել է նշուած վայրում գտնուող անձանց անդորրը, եւ նոյն եղանակով խափանուել է հանրային միջոցառումը:
Ձեռք բերուած բաւարար փաստերի հիման վրայ նկարագրուած խուլիկանական գործողութիւնների 5 մասնակցի նկատմամբ քրէական հետապնդում է յարուցուել ՀՀ Քրէական Օրէնսգրքի 297-րդ յօդուածի 2-րդ մասի 1-ին կէտով:
Նախաքննությունը շարունակւում է»,- ըսուած է հաղորդագրութեան մէջ։
