Հայաստանի Հանրապետութեան վարչապետ Նիկոլ Փաշինեան ընդունած է ԵԱՀԿ Մինսքի Խումբի ԱՄՆ համանախագահ, Կովկասեան բանակցութիւններու հարցերով աւագ խորհրդական Ֆիլիփ Ռիքըրը:
Նիկոլ Փաշինեան ողջունած է անոր այցը տարածաշրջան եւ բարձր գնահատած է ԱՄՆ-ի դերը` որպէս ԵԱՀԿ Մինսքի Խումբի համանախագահ պետութիւն:
Զրուցակիցները քննարկած են Լեռնային Ղարաբաղի հիմնախնդիրին, այդ շարքին` Ստեփանակերտի եւ Պաքուի միջեւ քննարկումներու միջազգային մեխանիզմի ձեւաւորման վերաբերող հարցեր:
Միտքեր փոխանակուած են Հայաստան-Ատրպէյճան յարաբերութիւններու կարգաւորման, տարածաշրջանային կայունութեան ու անվտանգութեան առնչուող այլ թեմաներու շուրջ:
Զրուցակիցները անդրադարձած են նաեւ հայ-ամերիկեան ռազմավարական երկխօսութեան շրջանակին մէջ համագործակցութեան վերաբերող հարցերու: Կարեւորուած է ԱՄՆ-ի շարունակական աջակցութիւնը` Հայաստանի մէջ ժողովրդավարական բարեփոխումներու արդիւնաւէտ իրականացման գործին մէջ: